In galera li panettieri
In galera li panettieri
mò ca s'erano arreccuti
tutti s'erano resoluti
deventare cavalieri
in galera li panettieri.
In galera li panettieri
mò ca s'erano ingranduti
nun vedevano li paputi
ca turnavano comm''a ieri
in galera li panettieri.
In galera li panettieri
se credevano già baroni
d'affamà la pupulazione
nun se devano penzieri
in galera li panettieri.
Oh che spasso che bellu sfizio
quanno venne la giustizia
ca diceva: "mò che ne spieri"
pave hoggi chello d'ajeri
in galera li panettieri.

Vurria ca fosse ciaola
Vurria ca fosse ciaola e ca vulasse
a 'sta fenesta a dirte 'na parola
ma non ca me mettisse a la gaiola
E tu da dinto subbeto chiammasse
viene marotta mia, deh, viene Cola
ma non ca me mettisse a la gaiola
Et io venesse et hommo returnasse
comm'era primmo e te truvasse sola
ma non ca me mettisse a la gaiola
E po' turnasse a lu buon sinno gatta
ca me ne ascesse pe' la cataratta
ma che 'na cosa me venesse fatta.


Li sarracini adorano lu sole
Li sarracini adorano lu sole
et li turchi la luna cu li stelle
et io adoro chesti trezze belle.
Li marenare quanno hanno furtuna
chiammano per aiuto quacche santo
et io a te sola invoco nel mio chianto.

Tutti li schiavi cercano fuggire
et vurriano spezzare li catene
et io invece cchiù me schiavo a tene.


Egea
strumentale


Medina
Suonno d'oro de stu vico addò va chistu motivo
chissà chi ce l'ha purtato chissà chi se l'è 'nventato.
'Nu miracolo c'è stato tutt''o vico s'è scetato
'a luntano dint''o scuro se senteva 'nu tamburo...
'A mugliera 'e don Gaetano abballava chianu chiano
c''a tammorra murmuliava sta canzone ce cantava :
Jesce sole - jesce sole
jesce sole oje sole...
Suonno 'e sta disperazione pe' sentì chesta canzone
quanta gente s'è fermata tutt'attuorno s'è assettata.
E li vecchie 'ncopp''e grade e li femmene p''a strada
senza manto e senza fronne me parevano Madonne.
Dint''o vico d''a paura ride sulo 'na criatura,
c'è chi fuje 'a part'e fora ma ce sta chi allucca ancora:
Jesce sole - jesce sole
jesce sole oje sole...
Jesce sole, scagliente 'mperatore,
scanniello mio d'argiento ca vale quattuciento.
Nun chiovere, nun chiovere
c'aggia ire a movere,
a movere lu grano
de masto Giuliano
E 'ncantate so' sti mamme l'uocchie pierze 'a 'n'ato munno
so' venute a una a una a cantà pe' sti guagliune...
Oi fronna 'e chesta gioia sona ancora stu mutivo,
chissà chi ce l'ha purtato chissà chi se l'è 'nventato.
E li vecchie 'ncopp''e grade e li femmene p''a strada
senza manto e senza fronne mò me parono Madonne...
Alli uno alli uno 'a tre juorne sto diuno
alli doje alli tre vienetenne 'mbraccio a me.
Alli quattro alli quattro mò to dongo e mò to schiatto
alli cinche alli sei datemelle 'e robbe meie.
Alli sette alli sette 'o tuppo 'e mammeta dint''o vasetto
alli otto alli nove mò te schiatto sti doie ove...


Moresca mia
O Lucia sfurtunata Giorgia tua all'acqua andata
Sienta sienta fatta bella
s'è 'nfunnuta la gonnella
asina passata et l'ha pretiata
Po' n'auciello 'a coppa l'ha cacata
Miao, miao, miao, cuccuruccù.
Va' mossuta scartellata va' cornuta
Fa' la cana, auza coda, piscia 'nterra!
Brutta schiava 'ncerreciata tutta quanta la jurnata
Comm'à ciaola traditora
senza me te l'haje sbignata
Stava tutta pronta la lucerna
va' canazza, cana de taverna!
Miao, miao, miao, cuccuruccù.
Comm'à gatta io fuiuta 'ncalora t'ha lassata
Per vedere piscatora a la larga de Castella
Ma passata a me fantanasia
M'he turnata tutta gelosia
Miao, miao, miao, cuccuruccù.
Va' pavona, vola 'ncielo, cada 'nterra!
Fa la rota, gira 'ntuorno fa' rondella.
Scioscia vienta, tuona canta, lampa allumma la marina
Giorgia Giorgia, traditora, crai tu tuorn'à la Turchia
cu na funa 'ncanna arrevogliata
cu tre auciella d'oro accumpagnata
Miao, miao, miao, cuccuruccù.


Antidotum Tarantulae
strumentale


L'Italia è bbella
Addò si' nata tu 'a sera 'o cielo è rosa,
e ll'acqua è comm'a ll'oro : è preziosa!
e 'a sabbia 'nfonne tutt''e ccose...
Addò si' nata tu 'o sole abbrucia 'a pelle,
e 'a notte, cchiù vicine songo 'e stelle,
e ce ne stanno a mille a mille...
Ah, tu ca sunnave 'e te fa accumpagná d' 'o viento...
penzaste : "Che furtuna 'a vita in Occidente..."
E chesto è assaje pe' chi nun tene niente!
Quanta criature arrivano 'a luntano
pe' vedé crescere 'stu grano!
Ah! Ll'Italia è bella
pe' chi tene 'a faccia nera!
Ma areto a 'sta ricchezza...
sapisse ch'amarezza!
E te n'accuorge quanno scenne 'a sera...
e pienz' 'o cielo tujo ch'è rosa...
e 'a luna giá sta llá...
mentre n'airone se ne va...
Addò tu si' venuta è tutto n'atu munno,
e nun è comme te pareva 'nzuonno...
e mo ca 'o tiempo sta cagnanno...
Addò tu si' venuta quacche sera chiove,
e nun è doce chello ca se prova...
penzanno a chesta vita nova!...
Ah! Ll'Italia è bella
pe' chi tene 'a faccia nera!
Ma areto a 'sta ricchezza...
sapisse ch'amarezza!
E te n'accuorge quanno scenne 'a sera...
e pienz'a 'o cielo tujo ch'è rosa...
e 'a luna giá sta llá...
mentre n'airone se ne va...


Tzigari
Tzigari,
'nu nomme ca è ciento culure,
Tzigari,
che ne parlammo a ffà.
Tzigari,
uocchie nire dint''o viento,
Tzigari
nun ve scurdammo cchiù...
Senza core, senza onore,
'e penzammo senza ammore.
Attuorno 'o ffuoco pe' parlà,
'na strada nova 'a se 'nventà,
dimmane 'n'ato viaggio 'a raccuntà...
'O cielo ca guardammo e chi maje s''o pò accattà,
'o viento ll'aria e 'o mare e chestu ppoco 'e libbertà...
Ah chesta terra 'e nisciuno,
nuje l'hammo accisa cu tutte 'sti mmura,
va tutto bbuono accussì,
zitto e fa' finta 'e nun capì...
Tzigari,
vuje ve spartite pure 'o bbene,
Tzigari,
angeli 'e mmiez''a via.
Senza core, senza ammore...
Sentenno ll'albere 'e parlà,
e 'o viento ca 'e ffà sunnà,
'na stella cade pe' se fà tuccà.
Ah chesta terra 'e nisciuno,
nuje l'hammo accisa cu tutte sti mmura,
va tutto bbuono accussì,
zitto e fa' finta 'e nun capì...
'O cielo ca guardammo e chi maje s''o pò accattà,
'o viento ll'aria e 'o mare e chestu ppoco 'e libbertà...


Danza d'oriente
strumentale


Stella d'argiento
'O sole quando nasce, nasce a Oriente,
se dice ca llà sta 'na Terra Santa
addò 'nu tiempo arrivaje da luntano 'na stella 'e argiento,
p'accuntentà tutta sta gente...
Quanta misteri m'hanno raccuntato,
attuorno a 'stu paese turmentato,
mò pare ca 'ncoppa 'sti prete Cristo nun c'è mai passato,
mentre se dice ca lloco è nato...
Nuje quanno vene Natale
ce sentimmo tutte cchiù carnale,
quando 'a gente aspett''a sera
pure 'o friddo se fa cchiù liggero
è primmavera, è primmavera,
tutto pare ca è overo...
Quando tramonta 'o sole all'orizzonte,
so' ancora 'nfuse l'uocchie 'e 'sti viandanti,
'mmiez'a 'sta guerra, chi cerca 'nu riparo trova sulo viento,
mille diavule e quacche santo...
Nuje quando vene Natale
ce sentimmo tutte quante eguali,
e lassammo 'e port'aperte
rimanimmo tutt''a notte allerta
è primmavera, è primmavera,
tutto pare ca è overo...


Musica popolare
Lucariello va p''e feste
e cunosce tutt''e poste,
nun appena vene maggio
accummenciano 'sti viaggi.
E' assaje forte 'sta passione pe' sti tradizioni...
Pass''o tiempo, cagna 'o munno
e se resta guaglione.
Lucariello va p''e feste
quanta sciure p''e feneste,
chi p''a strada, chi s'affaccia,
chi se pitta pure 'a faccia...
Saje ca chistu juorno
pure Cristo chiude n'uocchio,
e po' quanno è 'a sera
che male dint''e ginocchia...
Musica popolare
nasce mmiez''a gente ca nun tene niente...
Musica popolare
rosa 'e chesto ammore rosa mia d'argiento...
Lucariello va p''e feste
pe' cercà 'nu munno onesto,
e te dice guarda annanze,
senza maje lassà 'st'usanza...
Chesta vita è 'na catena
si se spezza se ne vene.
Chiove, jesce 'o sole e po'…
sponta l'arcobaleno...
Musica popolare
nasce mmiezo 'a gente ca nun tene niente...
Musica popolare
rosa 'e chesto ammore rosa mia d'argiento...


Vottate l'acqua
Vòttate ll'acqua 'nfaccia,
arape bbuono ll'uocchie e 'o puo' vedè.
'O sole quanno passa,
se piglia 'e cose vecchie e chissà addò va.
Pass''o tiempo, cagnano 'e culure
corre 'a vita e che ce vuo' fa,
zitto zitto quanno 'a sera è scuro
'nziem''e stelle te vaje a cuccà.
A voce se fa stracqua
nun tiene cchiù parole pe' putè alluccà.
Te resta niente 'mmano,
tutto se fa luntano e nun 'o puo' acchiappà...
Ah l'addore d''e limune
'e l'ultimo ciardino chissà addò stà...
Luci 'e maggio p''e campagne 'a sera
'nu ricordo ca se ne và...
E me pare ajere abbascio 'o puorto e p''e quartiere
se cantava e se ballava tutt''e sere 'o nanianà.
E l'addore 'e mare ca saglieva chianu chiano
te girava t'avutava e te 'mbriacava...
E 'a notte ca se 'nfonne
senza tuccà l'acqua 'e stu mare e ce fa sunnà...
Vòttate ll'acqua 'nfaccia,
arape bbuono ll'uocchie e 'o puo' vedè.
'O sole quanno passa,
se piglia 'e cose vecchie e chissà addò và.
Ah l'addore d''e limune
'e l'ultimo ciardino chissà addò sta...
Luci 'e maggio p''e campagne 'a sera
'nu ricordo ca se ne và...
E me pare ajere abbascio 'o puorto e p''e quartiere
se cantava e se ballava tutt''e sere 'o nanianà.
E l'addore 'e mare ca saglieva chianu chiano
te girava t'avutava e te 'mbriacava...
Ah belli femmene
currite ccà, mille so' 'e stelle 'a putè cuntà.


Moresca del gatto
Allu mare,me purtate,
si vulite ca... me sanate.
Allu mare pe' 'na longa via,
mentre campo t'aggio amato
t'aggio amato…

Dint''a notte chiara, nun avè' paura,
ca se po' vedere 'a gatta quann''è nera…
Chicchirichì cuccurucù te po' parè 'nu juoco,
chicchirichì cuccurucù ce cride a poco a poco.

No nun è 'na malatia (miao miao miao)
e nemmeno 'na manìa (cride a me)
no nun è 'na fesseria (miao miao miao)
ma è pe' scaramanzia (pienza a te)

Specchio rotto (uoglio specchio)
Che disgrazia ca te po' accadè (marammè)
Uoglio 'nterra (uoglio specchio)
Vott''o sale tutt'attuorno a te (marammè)

Fà li corna quanno staje passanno 'nu malanno
'nu fierro 'e cavallo pe' maluocchie e 'e facce gialle…
E a chi nun ce crede 'ì dico nun pazzià,
tiene l'uocchie aperte, te ponno affatturà…

Nun passà pe' sotto quanno 'a scala è aperta
Coglieno cchiù 'e guardate ca ciento scuppettate.
Chicchirichì cuccurucù te po' parè 'nu juoco,
chicchirichì cuccurucù ce cride a poco a poco.

No nun è 'na malatia, (miao miao miao)
e nemmeno 'na manìa, (cride a me)
no nun è 'na fesseria, (miao miao miao)
ma è pe' scaramanzia... (pienza a te)

Specchio rotto, (uoglio specchio)
che disgrazia ca te po' accadè (marammè)
Uoglio 'nterra, (uoglio specchio)
vott''o sale tutt'attuorno a te (marammè)

Fà li corna quanno staje passanno 'nu malanno,
'nu fierro 'e cavallo pe' maluocchie e 'e facce gialle…
Nun se po' cchiù campare senza 'nu corno appriesso,
e si m'o scordo 'a casa, 'ì m'arretiro ambresso…


Uno doje e tre
Arrivajeno dall'Oriente,
facce scure cu 'e turbante,
senza Cristo e senza sante
mante d'oro e spade 'e argiento.
Po' venettero 'e Spagnuole
s'annammurajeno 'e 'stu sole,
miserere pater e gloria
e cagnajeno tutt''a storia.
'E purtajemo 'mparaviso
quanno passajeno 'e Francise,
liberté egalité
tout le monde il faut changer...
Dint''e terre e p''e campagne,
viva 'o re viva la Spagna,
statte zitta Carmagnola
cchiù nisciuno se cunzola...
Uno doje e tre
votta 'o tuocco e jesce a te
ce sta sempe chi se fotte
e tutt''a vita resta sotto... (x 2)
E scennette 'o Piemontese
stettemo bbuono 'nu mese
ma 'stu sole fa paura
pe' chi campa dint''o scuro.
So' sbarcate 'e Americane
ce hammo dato 'o core 'mmano
cu shoe shine e ciucculata
ce hanno bbuono arravugliato...
Quanta dollare 'ngiallute
quanto ammore hammo vennuto
'nu criaturo è nato niro
e 'sta mamma 'o chiamma Ciro...
Uno doje e tre
votta 'o tuocco e jesce a te
ce sta sempe chi se fotte
e tutt''a vita resta sotto...
(recitato) Uno doje tre, uno doje...
pa' te pa' te... juòca!


La sciorta ca 'ngrata
La sciorta ca 'ngrata
cuntraria me và,
se mostra spiatata
strellare me fà,
strellare me fà...
Bella donna, palla d'oro,
palummiello, speretillo
e riavolo pigliatillo
pe' lu surco và mò và!...
E la monaca vò lu ppane
e datele 'o ppane 'a monacà,
chi 'a 'mpana 'a ccà
chi 'a 'mpana 'a llà,
e datele 'o ppane 'a monacà!
E la monaca vò lu ccaso
e datele 'o ccaso 'a monacà,
chi 'a 'ncasa 'a ccà,
chi 'a 'ncasa 'a llà,
e datele 'o ccaso 'a monacà!
E la monaca vò lu pesce,
e date lu pesce 'a monacà,
chi 'a 'mpescia 'a ccà,
chi 'a 'mpescia 'a llà,
e date lu pesce 'a monacà!
E la monaca vò la pizza
e date la pizza 'a monacà,
chi 'a 'mpizza 'a ccà,
chi 'a 'mpizza 'a llà,
e date la pizza 'a monacà!...
S'aspetto ristoro,
m'accide e nun moro,
m'accide e nun moro,
se mostra spiatata,
strellare me fà,
strellare me fà!...
Bella donna, palla d'oro,
palummiello, speretillo
e riavolo pigliatillo
pe' lu surco và mò và!...
E la bella mia addò steva
'ncopp'a n'albero durmeva,
e chi le tuccava lu pere,
chella faceva "Uelà! Uelà!,
pere cu pere ca mò se ne vene,
naso cu naso ch'è rattacasa,
uocchie cu uocchie ca se scunocchia,
panza cu panza ch'è 'na valanza,
coscia cu coscia ch'è 'na brioscia
culo cu culo se romp''arciulo...


Pe' dispietto
Canto pe' dispietto,
pe' chi se crede ca sto zitto.
Canto pe' cantà,
pe' tutt''e storie 'a raccuntà,
ca forse nun se ponno di'
e ca nisciuno vò sentì...
Canto pe' dispietto,
pe' tutt''o male ca s'è fatto.
Canto pe' cantà,
pe' chi nun se vò accuntentà,
pe' chi se crede meglio 'e ll'ate
sulo pecché cchiù 'ncopp'è nato,
se sape 'a storia è sempe chella,
chi nasce preta e chi 'na stella...
Ccà nun se parla cchiù,
e sott''o stesso cielo
fatto pe' 'ncantà,
stammo senza ce guardà...
Ccà nun se parla cchiù,
se và sempe fujenno,
e 'a vita se ne va,
senza storie 'a raccuntà...
Canto pe' cantà,
pe' chi nun sape cchiù aspettà,
pe' tutt''o tiempo ca è passato
e nun ce simme maie truvate...
Canto pe' dispietto,
e 'o core sbatte forte 'mpietto
sapenno forse ca ce sta
'na strada ca ce fa 'ncuntrà...
Ccà nun se parla cchiù,
e sott''o stesso cielo,
fatto pe''ncantà,
stammo senza ce guardà...
Ccà nun se parla cchiù,
se va sempe fujenno,
e 'a vita se ne va,
senza storie 'a raccuntà...