Jesce sole
Jesce sole
nun te fa cchiù suspira'
siente mai
ca li ffigliole
hanno tanto da pria'
Jesce sole,
jesce sole!...

E' nata
E' nata mmiez''o mare 'na scarola
li turche se la jocano a premmera.
Chi pe' la cimma e chi pe' lu streppone
viato a chi la vence a 'sta figliola.
'Sta figliola è 'na figlia de notaro,
e 'mpietto porta 'na stella diana
Pe' fa' muri' ll'amante a ddoie a ddoie
quanno rompe la luna a lu levante...
E la luna e la luna
tutt''e ffemmene stanno annura.
All'annura e senza panne
mò ch'è 'a festa 'e san Giuvanne.
San Giuvanne san Giuvanne
è na crapa ca se scanna.
E' na crapa è na crapa
è nu cuollo senza capa
E' nu cuollo è nu cuollo,
primma è tuosto e doppo è muollo.
Primma è tuosto primma è tuosto
comm'abballa 'o sango nuosto.
E lu sango e lu sango
e lu mare se fa janco.
E lu mare e lu mare
e 'o vacile l'arrepara.
'O vacile 'o vacile
e 'o curtiello sott''e pile.
'O curtiello 'o curtiello
'o ricchino e 'o capetiello.
'O ricchino 'o ricchino
e 'na votte china e vino.
E 'na votte e 'na votte
'nu pertuso tene sotto.
'Nu pertuso 'nu pertuso
'ncopp''o lietto se l'è 'nfuso.
E 'nu lietto e 'nu lietto
e 'nu cuoppo de cunfiette.
E 'nu cuoppo e 'nu cuoppo
e 'nu fecheto de puorco.
E 'nu fecheto e 'nu fecheto
e nu gallo cu l'arteteca.
E 'nu gallo e 'nu gallo
san Giuvanne và a cavallo.
Và a cavallo 'mmiez''o mare
'nu capone e 'nu cumpare.
'Nu capone 'nu capone
ce 'o tagliamm''o cannarone
e ce 'o facimmo cu 'o limone,
e pure frateto è ricchione
E alli uno e alli uno
e alli roie e alli roie
e alli tre e alli tre
e alli quatto e alli quatto
e alli cinche e alli cinche
e alli sei e alli sei
e alli sette e alli sette
e alli otto e alli otto
e scòmpale 'a capa
e dàlle na botta
pe' sotto e pe' coppa uh!...

Villanella di Cenerentola
Chi nasce annuda e chi nasce 'ncammisa.
I' ca nascette annuda e senza niente,
aspetto ca pe' me cagna lu viento.
Chi nasce cane e chi nascette gatta.
I' ca nascette gatta e no canillo,
aspetto 'e m''o 'ncappa' nu suricillo.
Chi 'a tene 'argiento e chi la tene d'oro
la cajulella pe' 'ncappa' 'o palummo,
e forse io sola 'a tenarraggio 'e chiummo.
Chi nasce 'ncunia e chi nasce martiello.
Si 'stu martiello 'ncasa e nun m'apprezza,
pure vene lu juorno ca se spezza.
Chi nasce janco e chi niro gravone.
I' mò gravone so' ma te n'adduone,
lu juorno ca m'appicciarraggio bbuono.

Canzone dei sette mariti
'A primma vota ca me spusaie,
'nu navigante io m''o pigliaie,
p''o primmo viaggio po' me 'mbarcaie
e nfri nfro nfra.
Ma quanno 'a nave trasette 'mpuorto
maritu mio mò stance accuorto,
ma 'a sera stessa
'e vvele acalaie,
a poppa tuzzaie
po' s'affunnaie c''o nfri nfro nfra...
'A siconda vota ca me spusaie,
de 'nu surdato me 'nnammuraie
c''a ffa' la guerra po' me 'mparaie
e nfri nfro nfra,
Ma 'a primma notte d''o serra serra
maritu mio che ffaie 'nguerra
apprimma avanzaie,
po' s' arritiraie,
'a bannera acalaie,
perdette 'a guerra e cchiù nun turnaie
e nfri nfro nfra...
E 'a quinta vota ca me spusaie,
nu mariuolo io me pigliaie,
ca 'a chiava faveza me rialaie
e nfri nfro nfra.
E tutt''e notte pe' dint''o scuro,
vuleva rompere 'a mascatura
io l'avvisaie,
ma isso furzaie,
po' jastemmaie,
e 'a chiava faveza se spezzaie
e nfri nfro nfra...
E 'a sesta vota fuie 'o destino,
'nu sunatore c''o viulino,
ca m''o faceva 'nu cuncertino
e nfri nfro nfra...
Ma po' facennome 'a serenata,
tutt''o strumento s'eva scurdato,
e 'o "mi" pruvaie,
e 'o"re" tuccaie,
ma nun fuie capace,
e i' ce 'o cantaie st'atu requie e pace
e nfri nfro nfra...
'E chistu passo l'aggio pruvato
aroppo 'e chisto ancora n'ato,
ma a tutte quante l'aggio atterrate
e nfri nfro nfra...
E mò arapimmo 'stu testamiento
ma senza spennerce 'nu lamiento.
Nisciuno 'e lloro me lassaie niente
e nfri nfro nfra...

Canzone delle sei sorelle
Che bella vocca
ca tene 'a primma sora.
L'ha fatto apposta
cu chella vocc''a fora,
quant'è bell''a primma sora
me n'ha fatto 'nnammura'
Vucchea 'a ccà
vucchea 'a llà
cu chella vocca te vo' vucchia'.
Che belli mmane
ca tene 'a siconda sora.
L'ha fatto apposta
cu chelli mmane 'a fora,
quant'è bell''a siconda sora
me n'ha fatto 'nnammura'
Manèa 'a ccà,
manèa 'a llà
cu chelli mmane te vo' mania'.
Che bella zizza
ca tene 'a terza sora.
L'ha fatto apposta
cu chelli zizze 'a fora,
quant'è bell''a terza sora
me n'ha fatto 'nnammura'.
Zezzèa 'a ccà
zezzèa 'a llà
cu chelli zizze te vo' zzezia'
Che bellu culo
ca tene 'a quarta sora.
L'ha fatto apposta
cu chillu culo 'a fora,
quant'è bell''a quarta sora
me n'ha fatto 'nnammura'.
Culèa 'a ccà
culèa 'a llà
cu chillu culo te fa scula'...
Che bella panza
ca tene 'a quinta sora
L'ha fatto apposta
cu chella panza 'a fora,
quant'è bell''a quinta sora
me n'ha fatto 'nnammura'.
Panzèa 'a ccà
panzèa 'a llà
cu chella panza te vo' spanza'.
Che bella cosa
ca tene 'a sesta sora
L'ha fatto apposta
cu chella cosa 'a fora,
quant'è bell''a sesta sora
me n'ha fatto 'nnammura'.
Te cos''a ccà
te cos''a llà
cu chella cosa te cusarra'

Duetto (mamma mamma che bella cosa)
- Mamma mamma che bella cosa
si me lu faccio chistu vel''e sposa,
e si riggina io pure ce addivento
a Cennerentola faccio schiatta' -
- E zitta mia figlia ca bene ti voglio,
primma 'e stasera te faccio spusa' -
- Sine mamma già me veco
cu 'nu manto e la curona 'ncapo,
ce ll'aggio fatto bbuono 'stu penziero
e tu n'haie da dubita' -
- Si la furtuna avota pe' essa
com'a riggina io pure starò.
E te li faccio li cumplimenti
pe' sti bellizze ca aute nun ce ponno -
- Io saccio bbuono ca nun dice buscia
e ca me dice la verità -
- E mò ca la sciorta ce stenne la mano
'nzieme a Palazzo nuie jammo a balla'.
E cu violin'e violoncelle
cu violoncell'e triccabballacche
tengo 'na figlia cu mmeza pacca...
ca cchiù zetella nun vole resta' -
- E quanno saranno feste e festine
'mmiez'a la tavula miette lu vino
sa quanta brindese vulimmo fa'
ih quanta brindese vulimmo fa' -
- E statte sicura ca tutto và bbene
si spuse lu re a mme me conviene
vire che ddote ca te faciarrà
vire che ddote ca te faciarrà -
- E non tengo dote e non tengo niente -
- Ma tiene 'na cosa ca vale pe' ciento -
- Nun saccio si abbasta pe' m'addota'
nun saccio si abbasta pe' m'addota' -
- E si è pe' la dote ca tu te lamiente
tengo 'e cuntante ca so' quattuciento
'a fora sta dote stu dunamiento
'stu curniciello t''o dace mammà -
- E chi porta mmiria pozza crepare
e pozza crepare e pozza schiattare
mò ca è lu tiempo 'e me spusa'
perle e lazziette lu rre me farrà -
- E tutta la pupulazione
me purtarrà rispetto e devuzione,
e quanno passo comm'a 'na prucessiona
addenucchiato ognuno stà -
- E addenucchiateve quanno io passo
pass''a riggina 'e chesta città,
e addenucchiateve quanno io passo
pass''a riggina 'e chesta città -

Rosario

Canzone del monacello
- Figlia figlia jesce e abballa -
- Patre patre nun pozzo asci' -
- Figlia figlia pecché pecché? -
- Jé nun pozzo accumpare' -
- Figlia figlia e che te manca
figlia figlia e che te manca? -
- A mme me mancano li cazette -
- E ghiette 'o monaco e accumparette
e li cazette lle facette -
- Figlia figlia jesce e abballa -
- Patre patre nun pozzo asci' -
- Figlia figlia pecché pecché? -
- Jé nun pozzo accumpare' -
- Figlia figlia e che te manca
figlia figlia e che te manca? -
- A mme me mancano li ricchine -
- E ghiette 'o monaco malandrino
e lle 'nfilaie li ricchine -
- Figlia figlia jesce e abballa -
- Patre patre nun pozzo asci' -
- Figlia figlia pecché pecché? -
- Jé nun pozzo accumpare' -
- Figlia figlia e che te manca
figlia figlia e che te manca? -
- A mme me mancano li scarpette -
- E ghiette 'o monaco e accumparette
e li scarpette lle facette -
- Figlia figlia jesce e abballa
jesce e abballa ca pare bella
l'anno passato ire zetella
mò si ffresca pe' mmareta'
pigliatille chisti cunfiette
'o muccaturo pe' ddint''o lietto
'o muccaturo lle pare scuro
'a senga e 'o monaco rint''o muro
'a mamma 'o caccia 'nu pere annuro
'a principessa e 'a pettenessa
'a peresina e 'o mantesino
'a suttanina e 'o principino
e c''o papuscio e 'o pere le struscia
e 'o pato che ttene 'o tene muscio! -

Villanella a ballo
strumentale (chitarra)

Moresca
O Lucia miau miau
gatta canta janchiata
quanno cucula antrasatta
fa' cu tia cuccurucuccu
rucca rucca
fa' la rota
gira 'ntuorno aiza cora
bene mia
miau miau cuccurucuccu
gatta e cucula 'ncalora
scioscia tua fuculara
Giorgetiella vo' abballara
Trava 'mpietta ce ha menata
tua bellezza negrecata
alla pietta 'nnammurata
tuzzulea la pretiata
vocca tua
'nzuccarata
occhi tua zizza tua
cula tua
Giorgetiella disperata
cchiù nun passa la nuttata
tozza capa e fa' sospira
a tua porta vo' trasira
Falla trasa pe' sta senga
brutta schiava ca mò venga
luna 'nciela cresce e ammanca
fa' la rota e nun se stanca
fa' la rota
va' e viena
addeventa luna chiena
panza priena
lassa attizza sta lucerna
core tosta de piperna
ma cchiù tosta capa mia
si nun rumpa gelusia
Miette uoglia a la carsella
tutta ciela a pecurella
vienta aiza tua vunnella
crai acqua a catinella
piglia acqua
sta 'nfenesta
arrepara mia tempesta
in tua testa
sette pecure accuvata
fatta bbona la quagliata
cuccuruccu l'ha liccata
comm'a lladra svergognata
tu biata
furtunata
'ncannacata
'ncurunata
sienta cuccuruccu la canzona
vola 'nciela penna de pavona
pavunessa metta sua curona
me sa buona
liuta sona
sona liuta
negrecuta
mora e campa
campa e mora
io mò moro
cuccuruccu miau miau
cuccuruccu miau miau
cuccuruccu miau miau
cuccuruccu miau miau

Madrigali
Che se magnaie la zita a pprimma sera
che se magnaie la zita la primma sera.
La primma sera ca ce se cuccaie...
'A primma sera ca se cuccaie
a essa venette 'o friddo e a isso 'a freva
Se ne fuiette comm'a 'na mariola
Che se magnaie la zita la primma sera
Che se magnaie la zita la siconda sera...
Che se magnaie la zita 'a siconda sera
quanno ricette chest'è la varca si vuo' navigare
Chi sarrà chi sarrà
chesta bella furetana
principessa o gran puttana.
Che sarrà che sarrà
che sarrà chesta schiattiglia
crepa 'ncuorpo mamma e ffiglia.
E lle dicette quanno fuie a mmare
chest'è la varca si vuo' navigare
A essa venette 'o friddo e a isso 'a freva
Se ne fuiette comm'a 'na mariola
Che se magnaie la zit''a siconda sera
Che se magnaie la zita alla terza sera
che se magnaie la zita alla terza sera...

Tarantella (oi mamma ca mò vene)
- Piglia 'o cane acchiappa 'o cane
'a capa d''o cane 'o cane 'o cane -
- Oi mamma ca mò vene -
- bim bom bà -
- Apre la porta e fallo trasi'
c''o 'mbamberambà e 'o 'mbamberambì -
- Oi mamma ch'è trasuto -
- bim bom bà -
- Piglia la seggia e fallo assetta'
c''o 'mbamberambì e 'o 'mbamberambà -
- Oi mamma s'è assettato -
- bim bom bà -
- Pripara la tavula e fallo magna'
c''o 'mbamberambì e 'o 'mbamberambà -
- Oi mamma c'ha magnato -
- bim bom bà -
- Pripara lu lietto e fallo cucca'
c''o 'mbamberambì e 'o 'mbamberambà -
- Oi mamma s'è cuccato -
- bim bom bà -
- Piglia 'o curtiello e vall'a scanna'
c''o 'mbamberambì e 'o 'mbamberambà -
- Piglia 'o cane acchiappa 'o cane
'a capa d''o cane 'o cane 'o cane.
'Na fuiuta
'na sagliuta
'na currut'a mezanotte
uno roie tre e quatto
cinche sei sette e otto
'a campana fino a ddurece
fuie 'a jatta e pur'e surece.
Oi mamma ca mò vene
'a capa d''o cane 'o cane 'o ca' -
- E scavezo rummane
'o pere e ammore -
- Piglia 'o cane acchiappa 'o cane
'a capa d''o cane 'o cane 'o ca'! -

Coro dei soldati
Napole Napole donna bella
l'he perduta la chianella
La chianella la corona
al re di Francia e d'Aragona.
La chianella la fantasia
al re di Spagna e di Turchia.
Napole Napole donna bella
senza chianella.
Napole Napole bella sirena
la luna chiena
la luna nova
Ogni soldato ci fa la prova...
Son sei sorelle
son tutte belle
per far l'amor!
Son sei sorelle
son tutte belle
per far l'amor!
E c'è la prima
ch'è piccolina
per far l'amor!
C'è la seconda
ch'è bruna e bionda
per far l'amor!
ma per la terza
ci vuol la sferza
per far l'amor!
E c'è la quarta
che fa la sarta
che parte in quarta
per far l'amor!
E c'è la quinta
che fa la finta
vergine incinta
per far l'amor!
E c'è la sesta
che va alla festa
per far l'amor!
Son sei sorelle Attenzio'!... Belli ffiglio'!... Aiere a Palazzo riale s'è
son tutte belle perza 'na scarpa 'mmiez''e scale!...
per far l'amor!
Son sei sorelle Chi ha perzo 'sta scarpetta 'na furtuna l'aspetta
son tutte belle si a cchesta bella prova se sottomette!...
per far l'amor!
E c'è la prima Nun avite appaura!... Cacciate 'o pere annura!...
ch'è piccolina Ogni surdato piglia 'a mesura pe' nu'scassa'
per far l'amor! 'o cufenaturo...
C'è la seconda 'Stu rre nun è nu cane!... E' bbuono comm''o ppane!...
ch'è bruna e bionda E si facci''o ruffiano è pe'll'onore napulitano!
per far l'amor!
Ma per la terza E mmò sparate 'o cannone ca 'o rre è nu
ci vuol la sferza sciampagnone!... e tanto d''a passione ca
per far l'amor! se vo' spusa' a tutt''a nazione!...
E c'è la quarta Attenzio'!... Belli ffiglio'!... Aiere a Palazzo riale s'è
che fa la sarta perza 'na scarpa 'mmiez''e scale...
che parte in quarta
per far l'amor!
E c'è la sesta Vucciahè... Brè brè brè!...
che va alla festa Cacciat''o pere e datel''o rre!
per far l'amor!
Son sei sorelle Attenziò!... Belli figliò!... Aiere a Palazzo riale
son tutte belle s'è perza 'na scarpa 'mmiez''e scale!...
per far l'amor!

Primo coro delle lavandaie
(cantato) Da stammatina
tammorr'e trombe!...
e de cennere n'aria c'abbampa!...
(recitato) Da stammatina tammorr'e trombe
tromb'e tammorre
comm'a quanno pass''a Sulitaria
d''o viennarì santo!...
Da stammatina 'na scarpa vacante
purtata 'mprucessione
e 'ncopp''e castielle
ciente cannune
cu 'a vocc'aperta contr''o cielo
aspettanno 'nu signale
pe' fa' tremma' 'e paura o 'e gioia
tutt''e llastre d''e case!...
(cantato) E aspiette aspiette
oi core fino a ttanno!...
Si chesta varca nun è gghiut'a funno
nun è gghiut'a funno!...
(recitato) E' comme si 'sta jurnata
avesse fatt''o peccato
'e schiara' cu 'nu pere scavezo
ca tuttuquante nun vereno ll'ora 'e cummiglia'!
Pure 'o mare
stammatina sott''o sole
pareva 'na jastemma senza voce
e pure 'a voce d''e fecaiuole
nun tene 'o curaggio
d'appanna' chest'aria pesante
comm''a cennere dopp''o ffuoco!...
(cantato) Aiuto aiuto
lu munno s'è perduto!...
Li mmonache
se vonno 'mmaretare!...
(recitato) Avite 'ntis''e surdate?...
Sule lloro rireno
e cantano canzone furastiere
ca nuie nun cunuscimmo
e ca se sentono quanno s'è perza 'na guerra!...
E invece tutto chesto
pe' 'na scarpa perza
comme si se fosse perz''a rota d''o munno!
E 'o rre fa' 'na legge nova
cumannanno 'na prova
a onor'e gloria
d''a passiona ca l'ha muzzecato!...
E a gloria d''o rre
'stu paese s'è fermato
rint'a 'na connola busciarda
aspettanno sulo 'nu terramoto
'na lav''e fuoco
'na guerra
pe' pute' allucca' e chiagnere
verenn''o miraculo
'e 'nu santo senza capa
'e 'nu pere senza scarpa!
(cantato) Ammore ammore mio
fatt''o tavuto!...
e 'a rinto te ce miette fravecato!...
(recitato) Penzate a chella c'ha perzo 'sta scarpa!
'Na corz'all'alba cu 'e guardie appriesso
e 'o core 'nganna p''a paura!
(recitato) Paura 'e che?
E chi 'o ssape!
Puo' ssape' maie cher'è ca te fa' paura?
Vire stu sole!...
Pare ca te vo' bbene
ma 'e vvote nun pare ca te vulesse 'ncenneri'?
M''a chiamme paura!
E nun è bello pure vestirs''e stu calore
e addeventa' 'o calore stesso ca te spoglia
p'abballa' sott''a 'na trav''e fuoco?
Sapite che vve dico?
'Sta scarpa ca s'è perza stanotte è 'a fortuna nosta!
E' sempe 'na femmena ca l'ha perza
e si 'o rre ha scatenato l'inferno
vo' dicere ca senz''e essa nun po' sta'
E chi è essa?
Sempe 'na femmena!
Una 'e nuie ca se pò mettere sott''e piere 'o rre
e addeventa' 'a riggina 'e stu popolo!
(cantato) Oi sole sole
jesce a 'stu paese!...
Addo' chi te vo' bbene more acciso
bbene more acciso!...

Secondo coro delle lavandaie
Uh Marò che bellu suonno
uh Marò che bellu suonno,
m'è benuto 'nzuonno 'e notte
c''o penziero 'o stesso chiuovo
ca martella a sirece anne
e t'avuote dint''o lietto
e t'avuote e t'arrevuote
senza mai truva' arricietto.
M'è benuto 'nzuonn''o rre
m'è benuto comme fosse
proprio overo 'nnanz''a mme...
Seh... seh... seh... seh...
Proprio overo tale e quale
bello comm''a san Pascale
janco russo latte e mmele
comm''o pesce 'e san Rafele
Uh Maronna m'aggio 'ntiso
m'aggio 'ntiso 'a trava 'mpietto
'na trava e 'nu paletto
ddoie palle e 'na scuppetta
e 'na botta de curtiello
tacco e ponta'nu martiello
quanno 'nchiova e nun se chiea
preta pmmece e pummecéa.
Marammè marammè
chill''o rre vulev'a mme.
Seh... seh... seh... seh...
I' c''o fazzuletto angrese
tutto posema e fatt''a ccà
l'aggio rat''a stessa botta
cu 'na mossa aggraziata
l'è carut''a vetriata
l'è carut''a gelusia
'ncopp''o core
'ncopp''o core
ca sunnanno dint''o mmeglio
comme pienz''e fa' ll'ammore
rint''o suonno cu 'e llenzole
s'arravogliano còre e còre.
Ah... ah... ah... ah...
Quanno è stato a lu balla'
ih che musica e musicà
vota e gira 'a part''e ccà
'nziem''a mme isso vò gira'.
I' aggio ritto maistà,
Maistà si faie 'o palummo
ì t''a facci''a palummella
e t''a facci''a ballatella
ma si 'ncappe sott''a scella
me fernisce 'e rucchià.
Isso allora me tirava
e tirava 'a ppont''e pietto
io pe' sotto m'annascunnevo
scatenann''o fierr''o lietto.
Scatenanno 'e matarazze
cu 'e cuscine a ppere e a ccapo,
isso allora me sceriava
e int''o stommaco me turcevo
comm''e panne dint''a culata
sott''o sole ca 'nfoc''a loggia.
Una botta roie botte
gioia mia gioia mia
m'è benut''a fantasia
mena mè falla 'sta spesa
ca so' ricco e so' rignante.
Si cu mme viene a cavallo
io t''o metto st'aniell''o rito
e tt''o metto
e tt''o metto
ca si' bella e ca te spetta
tu si' 'a bella delli cazette.
Ah... ah... ah... ah...
E m'ha miso a 'sti parole
rint''o core 'na pugnlata
e po' 'mpietto m'ha rignuto
'e lazziette oro e curalle
perle 'rosse fatt''a nucelle
pigne e 'rappule cu 'e diamante.
'Nu spillone justo ccà
n'at''a ccà
po' cchiù a ccà.
Che pugnut''int''o sunna'.
Ah... ah... ah... ah...
Quanno è stato a lu vasa'
preta pommece e pommicià
siente 'o fforte si vuò pruva'.
Cerasiello pe' 'mpont''o musso
mela janca e milo russo
m'ha pigliato pe' sott''e brazze
e s'è miso a cunnulia'.
Cunnulianno 'sta fantasia
viene 'a ccà oi nenna mia
ca si' fatta pe' rigna'.
Io te voglio cunzula'.
'Mman''a tte t''o voglio da'
tutto 'stu munno pe' pazzia'.
Comm''a palla è 'stu munno sano
e ì' t''a dongo 'sta palla 'mmano.
'Mman''a mme
'mman''a tte
si' 'a riggina e ì' song''o rre.
Seh... seh... seh... seh...
Ma 'int''o suonno bell''e bbuono
m'aggio 'ntiso 'ncopp''a 'na spalla
cu 'nu pizzeco 'na strignuta
'na stregnuta c''o ppezzeca'.
Uh Maronna e che sarrà.
Rint''o mmeglio,
rint''o mmeglio
era mammema ca 'int''o mmeglio
è benuta pe' me sceta'.
Uh mannaggia 'a sciorta mia
m'è carut''a fantasia
m'è caruta c''o vulìo
miett''a toia ca ì mett''o mmio
rint''o mmeglio 'e 'stu ssunna'.
Uh mannaggia 'o baccalà
Chi t'è muorto oi mamma mà
puozza scula'
puozza schiatta'
puozz'j' cercann''a carità.
'Na botta 'nfronte puozz' assecca'
pe' sott''o ponte d''a Sanità
Ah... ah... ah... ah...
Ih che luna
ih che luna
'stu vulìo e 'stu ssunna'
quanno vene me fa fa'
ah ah ah ah
chi m''a vene a cunzula'
a Raziella...
Uh Maro' Maro' Maronna
lu marit'è muorto.
Uh Maro' Maro' Maronna
lu marit'è muorto,
cu 'na rosa spampanata
cu 'na rosa spampanata
cu 'na rosa spampanata l'ha lassata...
Mannaggia ccà mannaggia llà
mannaggi''a fessa 'e mammeta,
pe' sott'a te voglio passa'
voglio vede' comme se sta'
e chella vo' fa' vo' fa' vo' fa'.
Gira e vott''a mano ca vene
soret''a tene 'a tene 'a tena.
Vott''a mano ca s'è 'nfucata
e sott'a prevul''a tiene ll'uva
meglio a te ca a uno 'e nuie
e piglia 'o cane ca vene e fuie...
Piglia 'o trebbete c''a tiella
s'è 'nfucat''a furnacella
e lu mare annizza annizza
'o tuoio è mmuscio e 'o mio s'arrizza...

 

Canzone della zingara
Matalena Matalena
chi ‘a vò vergine e chi prena
uè
Matalena…
De ‘sta furtuna scaveza,
oi femmene spontute,
chi vanta,
vire subbeto
‘stu fatto cumm’’è gghiuto…
uè Matalena…

Ma dint’’a ‘sta
chianella sò sicura,
‘o rre vò cuntrullà chi l’ammesura,
‘a primma vò
fà ‘a prova e ‘o cunto nun le torna,
e quanno nun và bbuono,
se sente
‘e proder’’e corna…

Matalena Matalena
chi ‘a vò vergine e chi prena
uè Matalena…

A te ca sì zitella
t’’o dongo ‘stu cunziglio,
ca pure si
sò zengara,
sò stata mamma ‘e figlie...
uè Matalena

‘A femmena se
chiamma semp’ Ammore,
e l’ommo è sempe sulo cacciatore...
Tu ce sì
figlia,sora,puttana o ‘nnammurata,
ma quanno te marite sì ‘a Maronna
‘Mmaculata...

Matalena Matalena
chi ‘a vò vergine e chi prena
uè
Matalena…

Pure ‘a Maronna scauza perdette ‘nu scarpino,
e quanno ce
‘o truvaieno teneva ‘o figlio ‘nzino...
uè Matalena…

A chella bella
mamma ‘e Piererotta
addò succede sempe ‘o votta votta…
Addò pe’
devuzione succede ‘o serra serra
e doppo nove mise se scatena n’ata
guerra...

Matalena Matalena
chi ‘a vò vergine e chi prena
uè Matalena…

Ammore ammore scauzo nun saie comme se chiamma,
ma po’ comme se dice
“ca ‘a mamma è sempe ‘a mamma”
uè Matalena…

L’uommene songo comme ‘e
piccerille,
e vonno sempe ‘mmocca ‘nu zezzillo,
li femmene ca ‘o sanno
se l’assettano ‘nzino,
e tutto se fernesce a tarallucce e vino…

Matalena Matalena
chi ‘a vò vergine e chi prena
uè Matalena…

Uè
Matalena…
Matalena è ghiut’’a messa
l’hanno rotto ‘a pettenessa,
uè
Matalena...

Uè Matalena…
Matalena è ghiut’’a festa
l’hanno fatto ‘na
menesta
uè Matalena…

Matalena pe’ crianza,
tene sempe ‘a panza
annanze…
uè Matalena...

Matalena ‘nsuttanino,
l’hanno fatta ‘na mappina
uè Matalena

Matalena è ghiut’’o ballo
s’è abbuffat’’o parapalle
uè
Matalena...

Matalena Matalena
chi ‘a vò vergine e chi prena
uè
Matalena...

 

Il suicidio del femminella
- Li brache dellu mio ammore me voglio vennere
e facitemmelle accattare oi belli femmene
L'auciello dellu mio ammore se ne vo' fuiere
e 'ncappatelo stritto 'mmano oi belli femmene
La vocca dellu mio ammore mò vole vevere
e facitemmella zucare oi belli femmene
Ué Maronna Maronna
e quanta figlie tene sta mamma
Uno me l'ha prummiso
e mmò a mme nun m''o vo' dare...
- E ce steva nu scarparo
ca teneva 'a suglia 'mmano
'A mugliera c''o scartiello
o scassaie 'o bancariello
Quanno mmiezo me truvaie
'o scarparo jastemmaie
jastemmaie Gesù e sant'Anna
e carette 'a copp' 'o scanno
- Rint' 'o viculo 'e Filumena
llà nce sta 'na gatta prena
nun appena ch'è sgravata
tutt' 'e figlie s'ha magnato
- Sott'a n'albero accuvato
ce sta n'uorco 'nnammurato
si nu pireto ce mena
ogni pianta esce prena
- Mmiez' 'o campo chin' 'e fave
steva 'o ciuccio 'e gnora vava
nun appena c'arragliava
oro e argiento ce cacava
- E 'nu rre s 'annammuraie
'e 'na vecchia guallarosa
ma tuccannole 'a brioscia
'a menaie 'a copp'abbascio
- 'A bonanema 'e ron Arturo
s'accustaie 'o cufenaturo
s'arrubbaie 'o muccaturo
e nun me l'ha rato cchiù
- Chillo è 'o muccaturo mio
ca me rette mamma mia
m''o vennette a tiempo antico
ca chiuveva passe e ffiche
- Pass'e ffiche cu 'a scarola
chell'a gatta è mariola
p'abballa' 'ncopp' 'e riggiole
s'è abbuffat' 'a pummarola
- E abbuffatela cu 'e ppezze
chesta panza cu ddoi zizze
'ncuorpo miettece 'na mazza
si sta prova s'hadda fa'
- 'Nterr' 'a spiaggia 'e Margellina
m'è caruto nu scarpino
Femmene' vieneme 'nzino
si 'stu pere vuo' alliscia'
- Ma io tengo chi m'alliscia
'A lavannara nun 'o ccapisce
'O cane arreto 'a porta piscia
quanno piscia e vvo' trasi'
- E' trasuto a mmiezujuorno
Femmene' me metto scuorno
ma si n'ata vota tuorne
cu te voglio pazzia'
- Pazzianno pazzianno
s'è aizato fino 'nganna
S'è 'ntustat' 'o sciuttapanno
pe' fa' asci' 'o paperascianno,
Quanno jette 'o Ranatieilo
pazziaie 'o panariello
Quanno jette a ssantu Rocco
pazziaie 'o sott'e 'ncoppo
Pazziaie arreto e annante
e ascette 'na cosa tanta
M'aizaie 'a cammesella
e ascette 'na cosa bella
Oi ma' si nun ce crire
va a vvere' ca t'arrecrie
Sette arreto e vvinte annanze
se 'mbriacano 'e vvalanze
quanno perdono 'a crianza
pure 'o rre cu 'a panza 'nnanze...
- E aluzze aluzze
'e cant' 'o mare ce sta' nu puzzo
e vva te ce vutte
ca si no muore bell'e dannato!...
- Maronna!... S'è acciso!...

 

Jesce sole
Jesce sole
nun te fa cchiù suspira'
siente mai
ca li ffigliole
hanno tanto da pria'
Sole jesce sole
jesce sole!...

 

Scena delle ingiurie
leggi la scena (richiede flashplayer)

 

Finale
Ma io credo ca pe' sta' bbuono a stu munno
o tutte ll'uommene avarriano 'a essere femmene
o tutt''e ffemmene avarriano 'a essere uommene
o nun ce avarriano 'a essere né uommene né femmene,
pe' ffa' tutta 'na vita cuieta...
...e haggio ritto bbuono!