Jesce sole
Jesce, jesce sole
scagliente 'mperatore,
scanniello mio d'argiento
che vale quattuciento ;
ciento cinquanta
tutta la notte canta
canta Viola, lu masto de scola.
Masto masto,
mannancenne priesto
ca scenne masto Tieste
cu' lanza e cu' spada
cu l'auciello accumpagnato.
Sona sona zampugnella
ca t'accatto la gonnella,
la gonnella de scarlato :
si nun suone te rompo la capa.
Nun chiovere
nun chiovere
ca aggia ire a movere
a movere lu grano
de masto Giuliano.
Masto Giuliano
manname 'na lanza
ca aggia ire in Franza
da Franza a Lombardia
dove stà madama Lucia.
Nun chiovere,
nun chiovere,
jesce jesce sole.

 

Ritornello delle lavandaie del Vomero
Tu m'aje prummise quatto muccatore
oje muccatore...
I' so' venuto se mme le vuo' dare.
E si no quatto embè dammene doje,
chello ch'è 'ncuollo a te n'è robba toja.

 

Vurria addeventare
Vurria addeventare chianellette e po' stare
sotto a 'sti piere,
ma si lu sapisse
pe' straziarme tu currenno jsse.
Vurria addeventare cetrangolo pe' stare
a 'sta fenesta,
ma si lu sapisse
pe' darme morte seccare me farrisse.
Vurria addeventare specchio pe' te mirare
accussì bella,
ma si lu sapisse
a quacche vecchia brutta me darrisse.
Vurria addeventare ghiaccio pe' nun bruciare
accussì forte,
ma si lu sapisse
cu' 'st'uocchie ardente tu me squagliarrisse.

 

Lacreme 'e cundannate
Sta' tutt''o munno sano arrevutato,
pe' Sacco e pe' Vanzetti cundannate.
E chi vigliaccamente l'ha 'nfamate
mai n'ora 'e pace nun haddà truva'.
'A tutt'e parte arrivano pruteste 'nquantità,
facenn'appello cercano 'e farle aggrazzia'.
Doppo sett'anne 'e pena carcerate,
tra vita e morte chisti sventurate,
mò c''a cundanna è stata cunfirmata
nun ce sta mezzo p''e putè salva'...
Sul''o guvernatore giustizia lle pò ffa',
si Dio 'nce mett''o core,'a grazia lle farrà.
Sò state senza core tutte quante,
pure 'e giurate,ma che 'nfam''e gente,
nun sentono 'e rragione 'e chi è 'nnucente,
chesta nun è giustizia è 'nfamità...
'Sti sventurate chiagneno sò rassignate già
e dint''a 'na cella aspettano ca Dio l'haddà salva'...

 

Li 'ffigliole
Li 'ffigliole che n'hanno ammore
songo varche senza la vela,
so' lanterne senza cannela
songo cuorpe senza lu core,
li 'ffigliole che n'hanno ammore.
Li 'ffigliole che n'hanno amante
so' comm'arvole senza frutte,
so' turreno sicche ed asciutte
ca nun fanno sciure né chiante,
li 'ffigliole che n'hanno amante.
Li 'ffigliole che n'hanno amice
sanno poco che cosa è 'o bbene,
quanno po' la vecchiezza vene
s'asciarranno triste e 'nfelice,
li 'ffigliole che n'hanno amice.
Zetelluccie belle e cianciose
mò gustate che tiempo avite,
mò che tennere e fresche site,
tiempo 'e cogliere mò li rose,
zetelluccie belle e cianciose.
Lu pacchiano che beve e sciacqua,
va 'nforrato de stoppa e llino,
ma se aguanno non se fà vino,
se la face 'na panza d'acqua,
lu pacchiano che beve e sciacqua.

 

Canto dei Sanfedisti
A lu suono de grancascia
viva lu populo bascio.
A lu suono de tamburrielli
so' risurte li puverielli.
A lu suono de campane
viva viva li pupulane.
A lu suono de viuline
morte alli giacubbine.
Sona sona
sona Carmagnola
sona li cunzigli
viva 'o rre cu la famiglia.
A sant'Eremo tanto forte
l'hanno fatto comme 'a ricotta
a 'stu curnuto sbrevognato
l'hanno miso 'a mitria 'ncapa.
Maistà chi t'ha traruto
chistu stommaco chi ha avuto,
'e signure 'e cavaliere
te vulevano priggiuniere.
Sona sona
sona Carmagnola
sona li cunzigli
viva 'o rre cu la famiglia.
Alli tridece de giugno
sant'Antonio gluriuso
'e signure 'sti birbante
'e facettero 'o mazzo tanto.
So' venute li Francise
aute tasse 'nce hanno mise
liberté... egalité...
tu arrubbe a me
i'arrobbo a ttè...
Sona sona
sona Carmagnola
sona li cunzigli
viva 'o rre cu la famiglia.
Li Francise so' arrivate
'nce hanno bbuono carusate
e vualà e vualà
cavece 'nculo alla libertà.
A lu ponte 'a Maddalena
'onna Luisa è asciuta prena,
e tre miedece che banno
nun la ponno fa sgrava'.
Sona sona
sona Carmagnola
sona li cunzigli
viva 'o rre cu la famiglia.
A lu muolo senza guerra
se tiraje l'albero 'nterra
afferrajeno 'e giacubbine
'e facettero 'na mappina.
E' fernuta l'uguaglianza
è fernuta la libertà,
pe' vuje sò dulure 'e panza
signo' jateve a cucca'.
Sona sona
sona Carmagnola
sona li cunziglie
viva 'o rre cu la famiglia.
Passaje lu mese chiuvuso
lu ventuso e l'addiruso
a lu mese ca se mete
hanno avuto l'aglio arrete.
Viva tata maccarone
ca rispetta la religione,
giacubbine jate a mmare
ca v'abbrucia lu panare.
Sona sona
sona Carmagnola
sona li cunzigli
viva 'o rre cu la famiglia.

La canzone di Zeza
Pulcinella :
Zeza vire ca io mo jesco
statte attient'a sta figliola,
tu che sì mamma dalle bona scola...
Tienetella 'nzerrata
nun la fà prattecare
ca chella ca nun se sape se pò 'mparare,
uè se pò 'mparare.
Zeza :
Nun ce penzare a chesto
marito bellu mio,
ca a 'sta figlia me l'aggio 'mparat'io...
I' sempe le sto a dire
'na femmena 'nnorata
è cchiù de 'nu tesoro assai stemmata
... soro assai stemmata.
Pulcinella :
Vuie vedite signori mieie
a me che me succede
'nnant'a sta chiappa 'e 'mpesa de mugliera,
aiere jette a casa
e stutata stev'a cannela
n'ommo annascuso sott''o lietto steva.
Zè! Che ce faceva?
Zeza :
Mala Pasca ca te vatta
dint''a stu bruttu naso,
chillo era Don Fabrizio 'o patrone 'e casa,
vuleva la mesata
de lu mese passato
si nun era pe me ive carcerato,
ive carcerato.
Pulcinella :
Sarrà comme tu dice
io mò me n'aggia ire,
Vicenzella da 'sta fenesta fa' trasire.
Mugliera stance attienta
penza ca so' 'nnorato
nun fà ca torno a casa 'ncurunato.
Torno 'ncurunato.
(Pulcinella va via)
Zeza :
Sì pazzo si te cride
c'aggio 'a tenè 'nzerrata
chella povera figlia sfurtunata!
La voglio fà scialare
cu ciento nnammurate
cu prievete, signure e cu li surdate
pure cu 'e surdate!
Vicenzella :
Oi mamma mà che veco!
Nn'è chillo Don Nicola?
Mò proprio sarrà asciuto dalla scola!
Si chillo me vulesse,
io me lo spusarria
e cchiù sotto de tata nun starria.
Tata nun starria.
Don Nicola (entrando) :
Bennaie tutto lu munno
'stu spantu de biddizza,
comm'a sumaru io tir''a capizza.
Pe' chesta faccia bella
nun trovo cchiù arricietto,
de lacreme aggio 'nfuso tutto lu lietto,
aggio pisciat''o lietto!
Zeza :
Credite a me zì abbate
'sta povera figliola,
sbarèa sempe quanno stace sola,
nun penza cchiù a nisciuno
Vicenzella :
Tu m'haje da 'nguadiare
Zeza :
Si no essa stessa mò se và a scannare!
Uè se và a scannare.
Pulcinella (entrando) :
Senza ca tu te scanne
te faccio io 'stu servizio.
Zeza :
Marì ferma ca vaje 'mprecepizio!
Vicenzella :
Via tata mio perdoname
cchiù non lo voglio fare.
Pulcinella :
A tutt'e tre ve voglio addecreare!
Zeza e Vicenzella :
Uè ce vò addecreare!
Zeza :
Hai fatto 'na gran cosa
tiratella la mano!
Pulcinella :
Vattenne zucculona ruffiana...
Zeza :
A me... và muore acciso!
Pulcinella :
Tu me faie esse 'mpiso!...
Zeza :
Tu che canchero 'ncapa t'haje miso?
'Ncapo t'haje miso!
Don Nicola :
Arreto arreto t''o metto
'stu piezzo 'e cacafuoco!...
Cu Don Nicola haje fatto malu juoco!
Pulcinella :
Pietà, misericordia!
Io aggio pazziato...
Zeza :
Vì comme tremma mò 'stu sciaurato!
Sciù... pe' chi t'è nato!...
(Don Nicola spara tra le gambe di Pulcinella)
Vicenzella :
Si tu me vuò bene
nun m'accider'a tata,
nun me tene 'a mente 'sta jurnata!
Don Nicola :
La voglio pe' muglieri.
Che dici?... Sei contenti?
Zeza :
Rispunne 'nzallanuto... nun lo senti?
... nuto nun lo senti?
Pulcinella :
Gnorsì songo contento,
maie cchiù io 'na parola
m'hanna cecà si 'a dico a don Nicola!...
Ma vuie signori mieie
nun ve 'nzurate maie,
pecchè cu 'na mogliera passate 'nu guaio!...
Passate 'nu guaio!
Zeza :
Via dateve la mano
puzzate godè 'ncocchia!...
Pulcinella :
Uno ne cade e n'ato ne sconocchia!...
Vicenzella :
Maritu bello mio!
Don Nicola :
Mugliera de stu core...
Zeza :
Tutte faccia godè Copint'ammore!...
Dè Copint'ammore!
Fronne e tammurriate :
Ih quante me ne fa' chesta ccà abbascio,
vò marita' la figlia e port''a pressa...
E và dicenno ca tene li ccasce,
dinto ce tene 'e caccavelle 'e Sessa...
Carnevale và e vene
nuje ce ne jammo e nun venimmo cchiù...
Ih!... gioia soia....
Chella vecchia ruffiana s'è arrubbata 'a quatturana,
ì' pe' ce 'a fà vedè, ce 'a riett' 'mmano
Ih!... gioia soia

 

La morte de mariteto
La morte de mariteto aspett'io
e no per altro no,
ma mi dubito ca primma me mor'io,
deh quanto sì bella tu.
Deh ca la vorria trovare
ma non la pozz'asciare
accussì bella comm'a te.
E tutto lu juorno sto addenucchiato
e no per altro no,
e che Dio me lev''a 'nanze stu scurore
deh quanto sì bella tu.
Deh ca la vorria trovare
ma non la pozz'asciare
accussì bella comm'a te.

 

Quanno nascette Ninno
Quanno nascette Ninno a Betlemme,
era notte e pareva miezjuorno.
Mai le stelle lustre e belle
se vedettero accussì
e 'a cchiù lucente,
jette a chiamma' li Magge all'Uriente.
Nun v'erano nemmice pe' la terra,
la pecora pasceva c''o lione.
C''o crapette se vedette
'o liupardo pazzea',
l'urzo e 'o vetiello,
e co lu lupo 'mpace 'o pecuriello...

 

Cicerenella
Cicerenella mia
sì bbona e bella.
Cicerenella teneva 'no gallo
tutta la notte nce jeva a cavallo,
essa nce jeva po' senza la sella
chisto è lo gallo de Cicerenella.
Cicerenella mia
sì bbona e bella.
Cicerenella tenea 'na gallina
faceva ll'ove de sera e matina,
l'avea 'mparata a magna' farenella,
chesta è 'a gallina de Cicerenella.
Cicerenella mia
sì bbona e bella.
Cicerenella teneva 'na votte
metteva da coppa e asceva da sotto
ma nun teneva tompagno e cannella,
chesta è la votte de Cicerenella.
Cicerenella mia
sì bbona e bella.
Cicerenella teneva 'nu culo
ca pareva 'nu cofanaturo,
e l'ammustava la notte di stelle,
chisto è lu culo de Cicerenella.
Cicerenella mia
sì bbona e bella.
Cicerenella teneva 'na vacca
c'aizava la coda e mustrava la 'ntacca,
ma nun teneva né ossa né pelle,
chesta è la vacca de Cicerenella
Cicerenella mia
sì bbona e bella.
Cicerenella s'aizava 'a matina
menava li pisce 'int''o mantesino,
uno fujette de sott''a vunnella,
chisto è lo pesce de Cicerenella.
Cicerenella mia
sì bbona e bella.

 

Angelarè
Nenna mia chi s'ha pigliata
nenna mia cchiù non ce sta,
quacche mago o quacche fata
se l'ha avuta da piglia'.
Angelaré bam bo
Angelaré bom ba.
Mò pe' terra e mò pe' mare
certo l'aggio da truva',
'nfì ca l'aggio da truvare
nun me voglio maje stanca'.
Angelaré bam bo
Angelaré bom ba.
Si nun trovo a nenna amata
voglio subbeto muri',
si vedit' a chella 'ngrata,
vuje dicitele accussì :
Angelaré bam bo
Angelaré bom ba.

 

Pastorella siciliana
strumentale (mandolino, mandola, mandoloncello, chitarra)