Fantanasia
strumentale (pianoforte, violino, flauto, mandoloncello, tiorba, percussioni)

 

Ciorta cuntraria
L'acqua m'asciutta, lu sole me 'nfonne,
tutte lli ccose meje cuntrarie vanno.
Io canto pe' canta' 'sta vita mia,
io canto pe' canta' 'sta fantasia, fantanasia.
Meno la paglia a mare e po' s'affonna,
meno lu chiummo e a riva se recoglie.
Io canto pe' canta' 'sta vita mia,
io canto pe' canta' 'sta fantasia, fantanasia.
Lli ccose de 'stu munno accussì vanno,
la gente fa lu male e io lu chiagno.
Io canto pe' canta' 'sta vita mia,
io canto pe' canta' 'sta fantasia, fantanasia.

 

Canzone mora
Jesce fora Catarina
sienta Giorgia tua cantare
fancela vedé c' abballa
falle fà lu zompa zompa
cu trumbette e cu tammorre
'sta canzona voglio fare.
Miau miau 'ncula alla padrona toia,
fai sentire l'auciella tua cantare,
và a la messa de pressa
lassa la menesta,
suricillo ca mora
dint' alla caiola.
Cuccuvaia, fà cuccurucù
Cuccuvaia, fà cuccurucù
Fa' passare la pavona
'nnaze all'uocchie addecreare,
ferma tu chesta cardilla,
aucellona mia 'nzevosa.
Va' la cummara mia
vurzilla tiene cara,
gallina ca cchiù nun cova,
gallina ca nun fà l'ova.
Jesce 'a dinto Catarina,
vide Picchia tua ballare,
e ce fa vede' lu naso
e ce dongo n'atu vaso
cu tiorbe e calasciune
'sta canzona voglio fare.
Miau miaù 'ncula alla padrona toia
fai sentire, l'auciella tua cantare,
và a la messa de pressa,
lassa la menesta,
suricillo ca mora
dint' alla caiola.
Cuccuvaia, fa cuccurucù.
Cuccuvaia, fa cuccurucù.

 

Canzone 'e fora
Pacienza nenna mia ch'aggio turnato,
sulo pensanno a te aggio campato.
So' stato comm' 'a 'ncarcere tenuto,
comm'a nu cane lupo 'ncatenato.
Spezzate li catene aggio scappato,
ca li suspiri tuoi m'hanno chiammato.
Muntagna pe' muntagna aggio passato,
sulo pensanno a te aggio campato.
Un'altro amante ca 'nce fosse venuto,
dice che c'è turnato l'amante vostro...
Comme ce posso sta' cuntenta io,
ca mamma me vò male maretare,
m'ha dato nu marito piccerillo.
Chi te l'ha ditto ca 'i nun te voglio,
piglia la pagliarella ca me te coglio.
A 'sta cuntrada sta' 'na bbona stella,
nessuno che la tocca ca è la mia.
I' l'haggio amata quanno era piccerella,
nun cammenava sola pe la strada.
E ora che s'è fatta tanto bella,
bellezza mia ognuno la vularria...
Ce s'è fatta cchiù bella bellezza mia,
e quanno vole Dio sarrai mia...

 

L'auciello grifone
Pate bello ca 'mmano me tiene
tieneme astritto e nun me lassa',
ca pe' 'na penna d'auciello grifone
fratemo è stato nu traditore...
E m'ha acciso e m'ha ammazzato,
dint' a nu fuosso m'ha menato.
Frate bello ca 'mmano me tiene
tieneme astritto e nun me lassa',
ca pe' 'na penna d'auciello grifone
fratemo è stato nu traditore...
E m'ha acciso e m'ha ammazzato,
dint' a nu fuosso m'ha menato.
Mamma bella ca 'mmano me tiene
tieneme astritto e nun me lassa',
ca pe' 'na penna d'auciello grifone
fratemo è stato nu traditore...
E m'ha acciso e m'ha ammazzato,
dint' a nu fuosso m'ha menato.
Frate 'nfame che 'mmano me tiene
tieneme astritto, nun me lassa',
ca pe' 'na penna d'auciello grifone
tu si' stato nu traditore...
E m'he acciso e m'he scannato,
dint'a nu fuosso m'he menato.

 

'Nterra e 'ncielo
I' sto sulo comm' 'a cane a chistu munno,
tengo 'o core niro comm' 'a lu gravone,
struppio m'è dato 'mpietto
ire per l'acqua abbascio me farraje.
Sona 'o liuto e bà cantanno
'na canzona notte e ghiuorno
chello ca i' voglio nun si tu,
so' 'na femmena 'ngrifosa,
comm' 'a gatta sfastediosa
voglio stare sempre in libertà...
'Nu liuto cu li corde de capille,
e 'nu flauto de petaccia me faraggio,
pe' te fa' 'nnammurare
cuncierto cu l'aucielli voglio fare.
'E fantasie ca vaje dicenno
danno sulo frusciamiento,
fà la mosca pure attuorno a me,
m'arricuordate lu mutto
viecchio quanto chisto munno :
"sta canzona troppo sta duranno"
Cumpagno n'aseno cecato truvaraggio,
e 'nu gallo sunatore de tammorra,
pure li pisci a mare
chiagnarranno lacreme de sale...
Sona 'o liuto e bà cantanno
'na canzona nott'e ghiuorno
chello ca i' voglio nun si tu...
Quanno vedarraje 'sti trezze,
fuje luntano comm' 'a viento
ca te 'ntomm' 'o naso si staje ccà...

 

Si la furtuna
Vurria sape' si la furtuna,
si la furtuna mangia,
tavula mia l'anvetarria.
E nce facesse nu banchetto d'oro,
fiche noce e nucelle,
viene furtuna alla tavola mia,
magna cu mmia, magna cu mmia.
Mentre magnasse nce addimmannarria
si tu furtuna, la sciorta mia
la sciorta mia s'avutarria.
Doppe mangiate rispunnarria,
cu chianto amaro, rispunnarria
so' la furtuna ma non pe' ttia.

 

Core 'e cane
E' fatta notte e non luce la luna,
Pascarié addo' me mann'a ruinare?
'Na notte famme stare accanto a vuje,
dimane schiara juorno e me ne vaco...
I' core 'e cane te cuntentarria,
ma po' addo' me vaco a cunfessare?
Te mann'a cunfessà 'a patre rumito,
la penitenza nun te faccio avere.
Pe' stutare lu fuoco 'nce vo' l'acqua
pe' durmì cu' sta nenna ce vo' 'mpegno...

 

La primma vota
La primma vota ch'io te rimmiraje,
chist'uocchie tuoje zaffire me penzaje.
Poi li truvaje de fuoco
c' abbruciano chi guarda pe' nu poco...
E quanno chesti trezze tuoje miraje,
matasse d'oro fino me penzaje.
Po' li truvaje catene,
ca fanno schiavo a chi vo' bbene a tene...
E quanno chistu pietto tuojo miraje,
de zuccaro 'stu core me pensaje.
Po' lo truvaje diamante,
ca spezza 'a vita amara 'e tutte quante...

 

Napolitana
strumentale (chitarra, percussioni)

 

Moresca mia
Oh Lucia sfortunata Giorgia tua all'acqua andata
sienta sienta fatta bella s''è 'nfonnuta la gonnella...
Asina passata et l'ha pretiata
pò n'auciello 'a coppa l'ha cacata
miau miau cuccuruccu
miau miau miau cuccuruccu miau miau...
Và mussuta scartellata và curnuta,
fa' la cana àuza coda piscia 'nterra...
Brutta schiava 'ncerreciata tutta quanta la jurnata,
comma ciaola traditora senza me te l'haje sbignata...
Stava tutta pronta la lucerna và canazza cana de taverna
miau miau miau cuccuruccu
miau miau miau cuccuruccu miau miau miau...
Comm''a gatta io fujuta 'ncalora t'ha lassata,
pe' vedere piscatora a la larga de Castella,
ma passata a me fantanasia, m'è turnata tutta gelosia...
Miau miau miau cuccuruccu
miau miau miau cuccuruccu miau miau miau...
Và pavona, vola 'ncielo cada 'nterra,
fa' la rota gir''attuorno fa' rondella...
Scioscia vienta tuona canta lamp''allumma la marina
Giorgia, Giorgia traditora, crai tu tuorne a la Turchia
cu 'na funa 'ncanna arrevugliata
cu tre auciella d'oro accumpagnata...
Miau miau miau cuccuruccu
miau miau miau cuccuuccu miau miau miau...