Italiella
O Italiella, o Italià.
'Mmiez''e cosce d'a frescura
llà se ferma 'o nainanà,
'a bannera 'e tre culure mò ce ha dato 'a libbertà...
O Italiella, o Italià.
T'he fatto la vunnella talià,
te l'è fatta de tre culure,
e nuje simmo rimaste annure
comme ce ha fatto mamma,
scauze annure e muorte 'e famma.
O Italiella, o Italià.
'A mugliera 'e Garibaldi
vend 'a 'nzogna e accatt''o lardo,
'a mugliera e Carlo Alberto
tene sempe 'a cascia aperta,
'a mugliera 'e Napulione
sape fà 'nu cuppulone,
'a mugliera 'e Manuele
vasa 'o pesce 'e san Rafele.
O Italiella, o Italià.
T'he fatto la carrozza talià,
t'he l'è fatta bella mia
'nzuoccolo 'nzuoccolo pe' la via,
pe' la via te la purtammo,
e nuie da sotto la carriammo.
O Italiella, o Italià.
'Mmiez''e cosce d'a frescura
là se ferma 'o nainanà,
'a bannera 'e tre culure mò ce ha dato 'a libbertà...
'A mugliera 'e Garibaldi
vend 'a 'nzogna e accatt''o lardo,
'a mugliera 'e Napulione
sape fà nu cuppulone,
e s''o ffà matin'e sera,
e le pror''a tabacchera...
O Italiella, o Italià.
T'he fatto lu stivale talià,
te l'he fatto bello e pronto
'ncoppa ce stà Turino ca conta
'ncoppa Turino conta
e nuie simmo lu tacco 'e ponta.
O Italiella, o Italià.
'A mugliera e Carlo Alberto
tene sempe 'a cascia aperta,
'Mmiez''e cosce d'a frescura
là se ferma 'o nainanà,
'a bannera 'e tre culure mò ce ha dato 'a libbertà...
O Italiella, o Italià.
T'he fatto la pettenessa talià,
te l'he fatta cu li turnese
ca pigliaieno 'a 'stu paese,
pò ce dettero pe' surpresa
la muneta cartaginesa...
O Italiella, o Italià.
'Mmiez''e cosce d'a frescura
là se ferma 'o nainanà,
'a bannera 'e tre culure mò ce ha dato 'a libbertà...
'A mugliera 'e Garibaldi
vend 'a 'nzogna e accatt''o lardo,
'a mugliera e Carlo Alberto
tene sempe 'a cascia aperta,
'a mugliera 'e Napulione
sape fà 'nu cuppulone,
e s''o ffà matin'e sera,
e le pror''a tabacchera...
O Italiella, o Italià.
T'he fatto lu cursetto talià,
te l'he fatto cu la credenza
'stu cursetto de Firenze,
Firenze è capitale
e Turino se n'have a male.
O Italiella, o Italià.
'A mugliera 'e Ferdinando
s'ha cuseva 'na mutanda,
'a mugliera 'e re Vittorio
fà 'nu pireto e scioglie 'a gloria...
'A mugliera e Carlo Alberto
tene sempe 'a cascia aperta,
'A mugliera 'e Garibaldi
vend 'a 'nzogna e accatt''o lardo,
O Italiella, o Italià.
Te vuò fà nu cappiello talià,
lu cappiello bene mio t'è venuto 'stu vulìo,
lu vuò levà' a lu Papa
e già te lu sì miso 'ncapa.
O Italiella, o Italià.
'A mugliera e Carlo Alberto
tene sempe 'a cascia aperta,
'a mugliera 'e Manuele
vasa 'o pesce 'e san Rafele.
'A mugliera 'e Ferdinando
s'ha cuseva 'na mutanda,
'a mugliera 'e re Vittorio
fà 'nu pireto e scioglie 'a gloria...
O Italiella, o Italià.
T'he fatto li cazette talià,
te l'he fatte de seta 'ngrese
e nuie avimmo fatto li spese,
pavammo nuie da sotto
e Manuele se ne fotte.
O Italiella, o Italià.
T'he fatto la vunnella talià,
t'he fatto la carrozza talià,
t'he fatto lu stivale talià,
t'he fatto la pettenessa talià,
t'he fatto lu cursetto talià,
t'he fatto lu cappiello talià,
t'he fatto li cazette talià,
t'he fatto la bannera talià,
la bannera de tre culure,
e nuje simmo rimaste annure
comme ce ha fatto mamma,
scauze annure e muorte 'e famma.
O Italiella, o Italià...

 

Masto Ruggiero
Janni dell'uorto se n'addunarria,
ca quanto faccio a ttia tutto è perduto.
Io nun so' muto
nemmanco so' paputo,
ture lure lu
ca saccio chi si' tu.
Non me la leva chesta fantasia,
ca nun ce grascia chest'è resoluto.
Io nun so' muto
nemmanco so' paputo,
ture lure lu
ca saccio chi si' tu.
Dall'auta parte la speranza mia,
ca quacche tiempo sarrò conosciuto.
Io nun so' muto
nemmanco so' paputo,
ture lure lu
ca saccio chi si' tu.
E te lu ddico mò rico lu vvero,
ca 'na spina te pugnarrà lu pere.
Io so' sincero,
e saccio cu chi ll'hai,
ture lure lu
ca saccio chi si' tu.
Tu pur te pienze de me fare Antuono,
io saccio addò te premme lu garrese,
io conosco lu lampo da lu tuono
e lu lumbardo ancor dall'Albanese.
Io t'aggio cunusciuto da lu tuono,
ma tu non me venì co 'st'entrammese,
Va' figlia mia ca Marzo te n'ha raso,
de vennere cetrole pe' cerase.
Sera passaje e tu bella durmive
nun t''a putiette dà la bbonasera.
'Nu juorno me ne jeva sepa-sepa
ce trovo 'n'albero carreco 'e prune.
Te la menaje pe' sott'a la porta,
susete bella mia e pigliatella...
Sagliette 'ncoppa pe' li scutrullare
'nterra carevano li pere ammature.
Ué Tere' Tere' Tere'
i' te voglio fà vedè'
'o tappillo sott''a fica
comm''o siente freccechià'.
Scennette abbascio pe' mme l'arunare
e chelle erano fiche tanto ll'una.
Se sose bella mia nun ce la trova
se l'ha pigliato lu viento ca mena.
Venette lu patrone delli cerase
rice : " Mariola! Tu m'arruobbe ll'uva".
E me menaje 'na preta a lu naso
lu sango me scurreva alli tallune.
Ué Nico' Nicò Nicò
quanta femmene 'ncuoll'a 'n'ommo
'o tappillo sott''a fica
mò t''o faccio freccechià?
Janni dell'uorto se n'addonarria...

 

Vurria addeventare soricillo
Vurria addeventare suricillo
pe' mettere paura a la zi'Annella,
le vurria dà 'no muorzo a lu perillo
e straccià la podèa de la gonnella.
E bà, e bà,
e 'sti breccie ca puorte 'mpietto
tu li puorte pe' me ciaccà
E bà, e bà,
e pe' me nun ce sta 'na muglierella.
E po' pecché so' tanto piccerillo,
me vurria abbuscà 'na peccerella,
ca veco 'nzurà' 'a chisto e 'nzurà' 'a chillo
e pe' me nun ce sta 'na muglierella.
E bà, e bà,
e 'sti breccie ca puorte 'mpietto
tu li puorte pe' me ciaccà'
E bà, e bà,
e pe' me nun ce sta 'na moglierella.
E bà, e bà,
e 'sti breccie ca puorte 'mpietto,
e pe' me nun ce sta 'na muglierella.

 

Si vide all'animale
Si vide all'animale,
ca stanno 'ncopp''a terra
tu pienze sempe a mmale,
tu vide sempe guerra!
'O cane, cu nu strillo,
vo' muzzeca' 'o muscillo,
ca afferra 'o suricillo
pure 'a dint''o mastrillo!
Marame'! Siente, sie'!
Che battaglia, neh!
'A vorpa po' ca è ffina,
aunita cu 'a faina,
s'arrobba a na gallina,
l'azzanna e s''a strascina.
Marame'! Siente, sie'!
Quant'arruobbe, neh!
'O lupo, preputente,
comme si fosse niente,
se mette sott''e diente,
'na pecora 'nnucente.
Marame'! Siente, sie'!
Chella more, 'mbe'!
Largo e tunno
chisto è 'o munno :
pure ll'uommene, se sa,
s'hann''a massacra'.
Che l'afferra
ca 'na guerra
ogne tanto s'hadda fa'?
Forse pe' sfulla'?!
So' 'e putiente,
malamente,
ca cchiù 'a vorza hann''a 'ngrassa',
senz'ave' pietà.
'O prugresso?
More 'o fesso!
Ih che bella civiltà!
Che mudernità!
Neh ma overo simme fatte
puorche crape pulicine,
ca ce accidono pe' niente,
ca ce levano 'e stentine?
Nun servimmo p''e ccustate
p''e ssacicce p''o ppresutto.
Nun cacciammo brodo e latte
pe' nun dicere uno 'e tutto.
Ccà nuie simmo crestiane,
e tenimmo 'o core 'mpietto.
E c'è cara 'a vita nosta,
perciò merita rispetto.
E vedimmo, pe' 'stu fatto,
'e campa' cu 'a legge 'e Ddio!
'Nnanze a Ddio nuie simmo eguale :
nun ce stanno "tu" e "io".
Ma però 'e Cumandamente
se rispettano? Nun sempe!
E se sape, 'o munno è tristo.
Chisti ccà so' brutti tiempe.
E ma allora, 'o munno è tristo
e nisciuno 'o pò cagna'?
Mo nce vo', 'e Cumandamente
nun se ponno rispetta'?
Una è 'a guerra ca ce spetta :
e purtroppo l''imm''a fa',
chella llà ca tutt''e juorne
se cumbatte pe' campa'.
'O cane, cu nu strillo,
vo' muzzeca' 'o muscillo,
ca afferra 'o suricillo
pure 'a dint''o mastrillo!
Marame'! Siente, sie'!
Che battaglia, neh!
'A vorpa po' ca è ffina,
aunita cu 'a faina,
s'arrobba a na gallina,
l'azzanna e s''a strascina.
Marame'! Siente, sie'!
Quant'arruobbe, neh!
'O lupo, preputente,
comme si fosse niente,
se mette sott''e diente,
'na pecora 'nnucente.
Marame'! Siente, sie'!
Chella more, 'mbe'!

 

Giuvanneniello
Giuvannenie' Giuvanne
guagliunciello 'e sei sett'anne
mamma toia tene che ffà
sette figlie addà campà
pirciò 'a scola te vo' mannà.
Ma rint'a chesta scola
nun te 'mpare ddoie parole
dice ca nun saje parlà
ca pirciò t'avisse 'a scurdà
comme parla mammà e papà.
Giuvannenie' Giuvanne
già tiene a mente
ce sta chi parla bbuono
e chi malamente...
Pirciò Giuvanneniello
'sta scola 'a lascia
ca po' parlà chi tene 'a mangiatora vascia.
Giuvannenie' Giuvanne
'mmiez''a via a sett'ott'anne
unu ggioco lle piace 'e fà
isso corre annanze e và
e 'n'ato arreto l'addà acchiappà...
'Stu ggioco 'int''o quartiere
'o fa sempe cu 'o brigadiere
quanno chisto l'ha 'ncappato
'o secuta pure 'o pato
ca 'o culleggio l'ha priparato...
Giuvannenie' Giuvanne
mò hanno saputo
ca pure d''o culleggio te ne sì fujuto...
Però Giuvanneniello
miette 'o pensiero,
e da dimane va facenno 'nu mestiere.
Nov'anne è unu mestiere
'o guaglione addu 'o barbiere
'na semmana he 'a faticà
ma quatto sorde te vonno dà
e 'o mazzo tanto te fanno fà...
'N'atu mestiere 'o 'ngarre
'o guaglion''e rint''o bar
curre cu 'a guantiera 'e tazze
si nun curre ognuno se 'ncazza
e te pavano 'a sputazza...
Giuvannenie' Giuvanne
sott'acqua e viento
se spogna 'sta fatica e nun guaragne niente.
Pirciò si cagna ancora
'n'atu mestiere
s''o 'mpara cu 'e cumpagn''e 'ncopp''e Filangiere.
Mò ferm'a 'na signora
- Neh signo' sapite ll'ora? -
Chella guarda 'a part''e llà
'nu zumpo 'a borza 'a puo' sceppà
fujenno primma ca pò sciatà...
Sceppanno t'arrevota
fuje 'ncopp'a 'sti ddoi' rote
isso arreto 'n'ato annaze
songo scippe fatt''e lanze
nun ce sta cchiù chi se scanza.
Giuvannenie' Giuvanne
ma 'o munno aspetta
e vene 'o juorno ca t''e mette 'sti manette...
Giuvanneniell''o ddice
pure 'o ggiurnale
'sta corza l'he fernuta mò a Puceriale.
Giuvannenie' Giuvanne
rint''a cella a ssirece anne
nun appena ca è arrivato
te l'abboffano 'e mazzate,
pe' sapé cu chi è assuciato...
E allora dint''o scuro
se da 'a capa rint''o muro
corre 'a guardia e 'o piglia 'e pietto
- Chisto è pazzo o fà 'e dispiette! -
e l'attacca 'ncopp''o lietto...
Giuvannenie' Giuvanne
no nun è pazzo
si trase 'o manicomio è malatia 'e razza.
'Na razza 'e guagliuncielle
tutt''e sirice anne
ca a Napule se chiammano comm'a Giuvanne...
'Na razza 'e guagliuncielle
tutt''e sirice anne
chiammate tuttuquante propeto Giuvanne.

 

Oi nenna nenna
Me so' susuto priesto stammatina oi nenna ne'
e pe' vedé lu sole addò ce sponta oi nenna nenna.
Ce sponta annant' alla marina oi nenna ne'
chiglio è ninnillo mio ca vò quaccosa oi nenna nenna.
Quaccosa io già 'nce ll'aggio dato oi nenna ne'
'nu pizzico, 'nu muzzeco e 'nu vaso oi nenna nenna.
'Nu vaso 'ncoppa alla vucchella oi nenna ne'
chiglio è palummo mio che ce s'apposa oi nenna nenna.
'Ncoppa li fronne re lli rrose oi nenna ne'
e pe' veré l'ammore addò reposa oi nenna nenna.
Riposa abbascio a la marina oi nenna ne'
e pe' veré lu sole addò reposa oi nenna nenna.
- E la luna mmiez''o mare
mamma mà maritame tu. -
- Figlia figlia che t'aggia dà. -
- E io voglio 'o scarpariello. -
- Si te dongo 'o scarapariello
'o scarpariello nun fà pe' te
sempe va' sempe vene
sempre 'a suglia 'mmano tene
si l'avota 'a fantasia
'a suglia 'nfaccia 'a figlia mia. -
- E la luna mmiez''o mare
mamma mà maritame tu. -
- Figlia figlia che t'aggia dà. -
- E io voglio 'o casadduoglio. -
- Si te dongo 'o casadduoglio
'o casadduoglio nun fà pe' te
sempe va' sempe vene
'o sasiccio 'mmano tene
si l'avota 'a fantasia
'o sasiccio mmano 'a figlia mia. -
- E la luna mmiez''o mare
mamma mà maritame tu. -
- Figlia figlia che t'aggia dà. -
- E io voglio 'o cucchiariello. -
- Si te dongo 'o cucchiariello
'o cucchiariello nun fà pe' te
sempe va' sempe vene
'a bacchetta 'mmano tene
si l'avota 'a fantasia
'a bacchetta 'nfaccia 'a figlia mia. -
- E la luna mmiez''o mare
mamma mà maritame tu. -
- Figlia figlia che t'aggia dà. -
- E io voglio 'o piscatore. -
- Si te dongo 'o piscatore
'o piscatore nun fà pe' te
sempe va' sempe vene
sempe 'o pesce 'mmano tene
si l'avota 'a fantasia
'o pesce 'nfaccia 'a figlia mia. -
- E io voglio 'o scarpariello
oi mamma ma' -
- Sempe va' sempe vene... -
- E io voglio 'o casadduoglio
oi mamma ma' -
- Sempe va' sempe vene... -
- E io voglio 'o cucchiariello
oi mamma ma' -
- Sempe va' sempe vene... -
- E io voglio 'o piscatore
oi mamma ma' -
- Sempe va' sempe vene... -
- E io voglio 'o guardaporta
oi mamma ma' -
- Sempe va' sempe vene
sempe 'a chiave 'mmano tene
si l'avota 'a fantasia
'a chiave 'mmocca 'a figlia mia. -
Reposa abbascio a la marina oi nenna ne'
e pe' veré l'ammore addò reposa oi nenna nenna

 

11 mesi e 29 giorni
I' scenno ra Salierno a vintun'ore
e a Napule arrivaie cu 'e ccatene.
Aizo ll'uocchie e veco 'a Vecaria
addò se 'ntise la cundanna mia.
Oima' t'arraccumanno 'e chella scellerata
e nun 'a fà mancà 'nu muorzo 'e pane.
Ai' lloco mò s'accosta chianu chiano
'na varchetella a vela e addò me porta.
Votta a passà chisti vintinov'anne
unnice mise e vintinove juorne.
Oima' t'arraccumanno ogne tre anne
'e me mannà 'na lettera e 'nu saluto.

 

La palummella
Palummella, zompa e vola
addò sta nennella mia,
non fermarte pe' la via,
vola, zomp''a chella llà.
Co li scelle la saluta,
falle festa, falle festa
attuorno attuorno,
e le dice notte e ghiuorno
i' sto sempe a suspirà.
Palummella, vola vola
a la rosa de 'stu core,
nun ce sta' cchiù bellu sciore
che t'avesse da piacè.
A l'addore ca tu siente
a chill'uocchie, a chillu riso,
credarraje ca 'mparaviso
tu sì ghiuto, oje palummè!
A lu labbro curallino,
Palummè, va' zompa e vola;
'ncoppa a chillo te cunzola,
e maje cchiù nun te partì.
Ma si vide ca s'addorme,
e te vene lu tantillo,
tu l'azzecca 'nu vasillo
e pe' me 'n'auto porzì!
Viene palomma pe' 'na fine r'anno,
unnice mise e vintinove juorne.