Aggio girato lu munno
Dint' a nu vico ce voglio fa' n'arco oi palummè,
tutto de rose e de sciure cuperto,
tutto de rose e sciure, oi palummè!
'Na fenestella posta 'a meglia parte oi palummè,
addo' s'appoia 'stu gentile pietto,
addo' s'appoia 'stu pietto, oi palummè!
Site cchiù janca vuie ca nce lu latte oi palummè,
la luna de Jenaro ve sponta 'mpietto,
la luna de Jenaro, oi palummè!
Tenite l'uocchie de prete d'aniello oi palummè,
'sta vocca quanno parla mena sciure,
'sta vocca mena sciure, oi palummè!
Aggio girato lu munno 'mparte 'mparte oi palummè,
ma una comm' a vuje n' 'a trovo certo,
ì' nun 'a trovo certo oi palummè!

 

'Na marotta
Ho visto 'na marotta fa' 'na danza
e n'aseno sonare 'na zampogna,
e 'na raosta cogliere cotogna...
E 'na monina correr co 'na lanza
accidere n'urz'al Alpe de Bologna,
e n'estrice a lottar cu 'na cecogna...
Ed a Caserta poi vidi a 'na vigna
'no gallo vecchio secutar 'na scigna
et essa se salvaje 'ncopp' 'a 'na pigna...

 

Tiempo mancante
Nuje simmo povere
e venimmo da Casoria
da Casoria e da Messina
simmo 'e povere pellerine...
Mastu Mineco fujette
rimanette 'a port'aperta
po' venette 'o mariuolo
s'arrubbaie 'e raffiuole...
Sagliette cchiù 'ncoppa
e truvaie 'na gatta morta,
scennette cchiù abbascio,
e truvaie 'nu mastedascio...
Mastedascio che fai lloco?
Faccio casce cu' cascione,
cascette e casciulelle,
pe' Maria 'a piccerella...
Maria mariola
port'a bevere 'e galline
'e galline fanno ll'ova
e Maria mariola...
E Maria dint'o ciardino
jeva cuglienno 'o petrusino,
petrusino nun ce ne steva
e Maria se ne fujeva...
Jette 'a casa e se cuccaie,
mastu Mineco scetaie,
jette 'a mare e se lavaje,
jette 'o sole e s'asciuttaie...
Po' s'ammalaie,
jette 'o miereco e 'a visitaje,
jette 'o prevete e 'a cunfessaje,
jette 'a morte e s'a pigliaje...

 

Tenite l'uocchie de la nigra serpe
Tenite l'uocchie de la nigra serpe,
e li capille de seta ritorte,
Io vurria da' nu vaso a chi v' 'e 'ntrezza,
cientecinquanta a chi 'ncapa li porta.
Vuie tenite 'o sguardo de la calamita,
e 'o nomme vuosto và pe' nummenata...
A quanto tiempo ca ccà nun so' stato,
vi' chest'anema mia quant'è patuta,
ce stevo cu 'e catene 'ncatenato,
luntano 'a vuje a lu 'nfierno so' gghiuto...
E cchiù tiempo passa, cchiù ammore ve porto
e a vuje sulo amarraggio, fino alla morte...
Vuje nun penzate mai li ccose storte,
e Dio ve l'hadda da' 'na bona sciorta,
ma si vuje pe' niente nun ghiat' adderitto,
v' 'o chiedo pe' grazia facitelo fitto.
No nun facite comme a lu passato,
sinnò v'accido e me ne vaco 'n'ata vota.

 

Parzonarella mia
Parzunarella mia, parzunarella,
si ammore scioscia 'mmocca a lu destino,
damme duie frutte de lo tuo ciardino.
Figliulo mio, io so' parzunarella,
ma so' guardiana de lo mio ciardino
nun songo femmena ca s'arruvina.
Damme sti purtualle malandrine,
dammelle presto si me le vuo' dare,
sinnò tu me arreduce a pazziare.
Nun tengo purtualle e ceraselle
ca non se ponno cogliere o 'mprestare,
agge pacienza, senza pazziare.
Si tu nun me vuo' da' sti ceraselle,
'mpriestame l'uorto e nun te dare affanno,
ca te l'arracquo senza fare danno.
Chiss'uorto mio nce tene uno frutto
e me lo guardo e me lu tengo caro,
ca si se coglie po' nun c'è reparo.
Lu frutto tuoio me face sfrennesiare,
parzonarella mia vide ca moro,
si nun me fai 'sta 'ràzia, faccia d'oro!
Farte 'sta 'ràzia a me me piaciarria,
ma si ce perdo po' la massaria.
tu me vuò fà' murire, arrassusia!

 

Dint' 'o mercato
Dint' 'o Mercato se jettaie lu banno
de dare gabelle a lu tiranno,
'a copp'e viche cu' 'e prete e cu' 'e mazze
scennettero e se renchiette 'a chiazza.
Femmene, criature, panettiere e li paranze
scauze, piscature e uno se facette 'nnanze.
Fuje Masaniello, tanno pe' tanno,
dint' 'o Mercato, a se piglià 'o cummanno,
appriesso a isso tutt''a pupulazione,
scennette pe' fà' 'a rivoluzione.
Cu prete, cu curtielle, cu furcune e cu surore
'a ggente grida e allucca :
"A morte lu Spagnuolo!"
'O Vicerrè, pigliato d' 'a paura,
chiamma a corte prievete e signure,
ca 'o dettero 'ncunziglio
pe' fà' calmà 'sti pazze
-"nvitammo Masaniello allu palazzo"-
Isso trasette e arreto se 'nzerrajeno lli porte,
e 'nu mutivo fino 'o chiamma e dice: "Io so' la morte..."
Dint' 'o Mercato ascette n'atu banno,
Napule canta : " A morte lu tiranno"
'ncopp'allu mutivo ca se sunava a corte
'nce stanno lli parole d' 'o piscatore muorto...

 

Madonna tu mi fai lo scorrucciato
Madonna tu mi fai lo scorrucciato,
che t'aggio fatto che 'ngrifi la cera...
Anema mia, chesta n'è via
de contentar 'st'affannato core.
Me par che m'habbi in tutto abbandunato
ca non t'affacci all'ora della sera...
Anema mia, chesta n'è via
de contentar 'st'affannato core.
Va' figlia mia, che ci aggio 'ndivinato
ca saccio con chi giochi a covallera...
Anema mia, chesta n'è via
de contentar 'st'affannato core.
Donna, caro mio ben, dolce signora,
habbi pietà d'un chi te solo adora...
Anema mia, chesta n'è via
de contentar 'st'affannato core.

 

Fateve 'nnanze
Ora su, Masto, veccoce allestute,
e ca volimmo correre e fa' danze
vuie mò, sonanno cetole e liute fateve 'nnanze!
O tu, de st'uocchie visciola e popella
Vicenza cara, affacciate da 'lloco,
e sta 'ndrezzata sbrenneta tu bella vide 'no poco.
Mo vecco comme zompo e comme saùto
de chisto calascione ad ogni trillo
che faccio saùte miezo miglio ad auto cchiù de no grillo...
Stienne 'ssa mano, scotola 'ssa gamma
fa' repolune, e botate a l'ampressa
Nina, te dico : "Sienteme madama, vocca de sguessa".
Oh bravo affe! De trinca nuie mò jammo
passa tu priesto, Mineco, pe' sotta
sbatte 'sti piede, Tontaro, e nuie 'ntrammo tutt'a 'na botta.
Ora su basta! Scompase stu juoco
Sia tutto chesto a gloria de Vicenza.
Vicenza 'st'arma schiaccola de fuoco dancell' 'e renza...