Medina
Suonno d'oro de 'stu vico addò và chistu mutivo,
chissà chi ce l'ha purtato chissà chi se l'è 'nventato.
'Nu miracolo c'è stato tutt''o vico s'è scetato
'a luntano dint''o scuro se senteva 'nu tamburo...
'A mugliera 'e don Gaetano abballava chianu chiano
c''a tammorra murmuliava 'sta canzone ce cantava :
Jesce sole - jesce sole
jesce sole oje sole...
Suonno 'e 'sta disperazione pe' sentì' chesta canzone
quanta gente s'è fermata tutt'attuorno s'è assettata.
E li vecchie 'ncopp''e grade e li femmene p''a strada
senza manto e senza fronne me parevano Maronne.
Dint''o vico d''a paura ride sulo 'na criatura,
c'è chi fuje 'a part'e fora ma ce sta' chi allucca ancora :
Jesce sole - jesce sole
jesce sole oje sole...
Jesce sole, scagliente 'mperatore,
scanniello mio d'argiento ca vale quattuciento.
Nun chiovere, nun chiovere
c'aggia ire a movere,
a movere lu grano
de masto Giuliano
E 'ncantate so' sti mamme l'uocchie pierze a 'n'ato munno
so' venute a una a una a cantà' pe' 'sti guagliune...
Oi fronna 'e chesta gioia sona ancora 'stu mutivo,
chissà chi ce l'ha purtato chissà chi se l'è 'nventato.
E li vecchie 'ncopp''e grade e li femmene p''a strada
senza manto e senza fronne mò me parono Maronne...
Alli uno alli uno 'a tre juorne sto diuno
alli doje alli tre vienetenne 'mbraccio a me.
Alli quattro alli quattro mò to dongo e mò to schiatto
alli cinche alli sei datemelle 'e robbe meie.
Alli sette alli sette 'o tuppo 'e mammeta dint''o vasetto
alli otto alli nove mò te schiatto 'sti doie ove...
Capera
Nun me posso movere, ì' sto sempe ccà,
saccio 'e fatte 'e tutte quante
e te posso 'nguaja'...
Sorde co 'nteresse e senza onore,
faccia tosta e senza core...
Si putesse dicere,chello ca ce sta',
troppe so' 'e jastemme appriesso,
e nun pozzo parla'...
Sorde spuorche e lacreme vennute,
uocchie trist' 'e chi è perduto...
So' capera oinè,
tengo 'e recchie dint''e mura,
so' capera oinè,
nisciuno me fa' paura.
Tutti 'sti turmiente
i' m''e teng' a mente...
Veco 'a gente ridere, sulo pe' pazzia',
ì' 'e guardo e sento,
e me pozzo 'ngrassa'...
Storia 'e corna e de disperazione,
notti janche e senza ammore...
Dint''e case quand'è scuro, me piace 'nciucia',
'e segrete 'e saccio,
si 'e sento 'e murmulia'...
Si me parle i' t'arap' 'o core
ma so' 'nfame e tradetora...
So' capera oinè
So' capera oinè...
Musica popolare
Lucariello va p''e feste
e cunosce tutt''e poste,
nun appena vene maggio,
accummenciano 'sti viaggi.
E' assaje forte 'sta passione pe' 'sti tradizioni...
Pass''o tiempo, cagna 'o munno,
e se resta guaglione....
Lucariello va p''e feste
quanta sciure p''e feneste,
chi p''a strada, chi s'affaccia,
chi se pitta pure 'a faccia...
Saje ca chistu juorno
pure Cristo chiude n'uocchio,
e po' quanno è 'a sera
che male 'int''e ginocchia...
Musica popolare
nasce 'mmiez''a gente ca nun tene niente...
Musica popolare
rosa 'e chesto ammore rosa mia d'argiento...
Lucariello va p''e feste
pe' cerca' 'nu munno onesto,
e te dice guarda 'nnanze,
senza maje lassa' st'usanza...
Chesta vita è 'na catena
si se spezza se ne vene.
Chiove, jesce 'o sole e po'
sponta l'arcobaleno...
Musica popolare
nasce 'mmiez' 'a gente ca nun tene niente...
Musica popolare
rosa 'e chesto ammore rosa mia d'argiento...
Porta Capuana
E' nuttata chiena 'e stelle
sta' 'o furnaro cu Taniello,
e ll'addore 'e pane 'e grano
se ne saglie chianu chiano...
Dint''o llario sta' Cuncetta,
sta' sunnanno 'o primm'aletto,
ma lu ffuoco s'è stutato
aret''a l'angolo d''a strada...
Ué nanassa
c''o primmo faccio ammore
e c''o sicondo me spasso.
(fronna) : Appiennelo ca te dongo pure 'o chiuovo,
appiennatillo 'o mazzo 'e sovere e l'uva fresca,
ih che belli mele!...
Sott''o pizz' 'e 'sti lenzole
fa 'nu cavero ca se more.
'A nuttata è già fernuta
e lu core s'è sperduto.
Schiara juorno a poco a poco,
tras''o sole dint''e viche,
vene e trase da luntano
dint'a Porta Capuana...
(fronna) : Vuje vulisseve cozzeche chiene,
i' ve faccio bevere 'o brodo d''e purpe veraci...
Ué nanassa
c''o primmo faccio ammore
e c''o sicondo me spasso...
Mare Nostrum
strumentale (chitarra, violino, viola, violoncello, flauto contrabbasso)
Pe' dispietto
Canto pe' dispietto,
pe' chi se crede ca sto zitto.
Canto pe' canta',
pe' tutt''e storie 'a raccunta',
ca forse nun se ponno di',
e ca nisciuno vò senti'...
Canto pe' dispietto,
pe' tutt''o mmale ca s'è fatto.
Canto pe' canta',
pe' chi nun se vò accuntenta',
pe' chi se crede meglio 'e ll'ate
sulo pecché cchiù 'ncopp'è nato,
se sape 'a storia è sempe chella,
chi nasce preta e chi 'na stella...
Ccà nun se parla cchiù,
e sott''o stesso cielo
fatto pe' 'ncanta',
stammo senza ce guarda'...
Ccà nun se parla cchiù,
se và sempe fujenno,
e 'a vita se ne va,
senza storie 'a raccunta'...
Canto pe' canta',
pe' chi nun sape cchiù aspetta',
pe' tutt''o tiempo ca è passato
e nun ce simme maie truvate...
Canto pe' dispietto,
e 'o core sbatte forte 'mpietto
sapenno forse ca ce sta
'na strada ca ce fa 'ncuntra'...
Ccà nun se parla cchiù,
e sott''o stesso cielo,
fatto pe''ncanta',
stammo senza ce guarda'...
Ccà nun se parla cchiù,
se va sempe fujenno,
e 'a vita se ne va,
senza storie 'a raccunta'...
Quando fernesce 'a guerra
Quando fernesce 'a guerra e vene 'o sole
vurria turnare a cammenare,
pe' chella strada a me cchiù cara
addò lu viento accarezz''o mare.
Ma nun è overo me l'hanno ritto ca nun è overo
si me n'addono, vurria durmire n'ata vota
e po' nun me scetare cchiù...
Nè chi vò, chi vò stu suonno nè chi vò?
Nè chi vò, chi vò cantare nè chi vò?
Comm''a viento de lu mare vene pe' te fa' sunnare,
tras'arinto e nun te lassa cchiù...
Guerra tu sì busciarda, sì mariola,
te sì arrubbato 'nu piezz''e core,
te sì pigliata la fantasia,
se n'è fujuta 'sta vita mia...
E 'sta canzone ca i' te canto è comm''a musica ca nun sona
ma se la voce mia va bbona i' canto e nun fernesco cchiù...
Nè chi vò, chi vò stu suonno nè chi vò?
Nè chi vò, chi vò cantare nè chi vò?
Comm''a viento de lu mare vene pe' te fa' sunnare
tras'arinto e nun te lassa cchiù...
Moresca del gatto
Allu mare,me purtate,
si vulite ca… me sanate.
Allu mare pe' 'na longa via,
mentre campo t'aggio amato
t'aggio amato…
Dint''a notte chiara,nun avè' paura,
ca se po' vedere 'a gatta quann''è nera…
Chicchirichì cuccurucù te po' parè 'nu juoco,
chicchirichì cuccurucù ce cride a poco a poco.
No nun è 'na malatia (miao miao miao)
e nemmeno 'na manìa (cride a me)
no nun è 'na fesseria (miao miao miao)
ma è pe' scaramanzia (pienza a te)
Specchio rotto (uoglio specchio)
Che disgrazia ca te po' accadè (marammè)
Uoglio 'nterra (uoglio specchio)
Vott''o sale tutt'attuorno a te (marammè)
Fa' li corna quanno staje passanno 'nu malanno
'nu fierro 'e cavallo pe' maluocchie e 'e facce gialle…
E a chi nun ce crede 'ì dico nun pazzià,
tiene l'uocchie aperte, te ponno affatturà…
Nun passà pe' sotto quanno 'a scala è aperta
Coglieno cchiù 'e guardate ca ciento scuppettate.
Chicchirichì cuccurucù te po' parè 'nu juoco,
chicchirichì cuccurucù ce cride a poco a poco.
No nun è 'na malatia, (miao miao miao)
e nemmeno 'na manìa, (cride a me)
no nun è 'na fesseria, (miao miao miao)
ma è pe' scaramanzia... (pienza a te)
Specchio rotto, (uoglio specchio)
che disgrazia ca te po' accadè (marammè)
Uoglio 'nterra, (uoglio specchio)
vott''o sale tutt'attuorno a te (marammè)
Fà li corna quanno staje passanno 'nu malanno,
'nu fierro 'e cavallo pe' maluocchie e 'e facce gialle…
Nun se po' cchiù campare senza 'nu corno appriesso,
e si m'o scordo 'a casa, 'ì m'arretiro ambresso…
Terra bruciata
Terra bruciata mille culure cunzumate
quanta speranze a poco a poco cancellate.
Chi se sparte''e strade senza maie s'accuntenta',
chi dice 'e nun sapé, e po' se fa chiatto comm'a che...
Terra scurdata stessi parole già scuntate,
quanta prumesse po' tutt'attuorno rest''o stesso.
Chi se 'nventa 'a vita senza maie se lamenta'.
e chi comm'a 'nu re tutte quante 'a sotto vò tene'...
Ferdinando sta 'mmiezo 'o mare,
e cunosce tutt''e canzone,
dice ca ce crede ancora
mentre canta "anema e core"...
Terra perduta quanta misteri annascunnuti,
dint''e purtune pe' sott''e mura, che paura.
Chi nun dorm''a notte o part''e nun torna cchiù,
e chi ce perd''a vita, troppi cose nun l'ha maie capite...
Ferdinando sta 'mmiezo 'o mare
e cunosce tutt''e canzone
dice ca ce crede ancora
mentre canta "anema e core"...
Stella d'argiento
'O sole quando nasce a Oriente,
se dice ca llà sta 'na Terra Santa,
addò 'nu tiempo arrivaje da luntano 'na stella 'e argiento,
p'accuntenta' tutta 'sta gente...
Quanta misteri m'hanno raccuntato,
attuorno a 'stu paese turmentato,
mò pare ca 'ncoppa 'sti prete Cristo nun c'è mai passato,
mentre se dice ca lloco è nato...
Nuje quanno vene Natale
ce sentimmo tutte cchiù carnali,
quando 'a gente aspett''a sera,
pure 'o friddo se fa cchiù liggero,
è primmavera, è primmavera,
tutto pare ca è overo...
Quanno tramonta 'o sole all'orizzonte,
so' ancora 'nfuse l'uocchie 'e 'sti viandanti,
'mmiez'a 'sta guerra, chi cerca 'nu riparo trova sulo viento,
mille diavule e quacche santo...
Nuje quando vene Natale
ce sentimmo tutte quante eguali,
e lassammo 'e port'aperte
rimanimmo tutt''a notte allerta
è primmavera, è primmavera,
tutto pare ca è overo...
Danza d'oriente
strumentale (mandoloncello, chitarra battente, violino, lira pontiaca, ottavino, flauto, contrabbasso, percussioni)