Introduzione
voci dei quartieri di Napoli

 

Jesce sole
Jesce, jesce sole,
scagliente 'mperatore,
scanniello mio d'argiento
ca vale quattuciento.
Jesce, jesce sole.
Ciento cinquanta
tutta la notte canta
canta Viola, lu masto de scola.
Masto masto,
mannancenne priesto
ca scenne masto Tieste
cu' lanza e cu' spada
cu l'auciello accumpagnato.
Jesce, jesce sole,
scagliente 'mperatore,
scanniello mio d'argiento
ca vale quattuciento.
Jesce, jesce sole.
Sona sona zampugnella
ca t'accatto la gonnella,
la gonnella de scarlato :
si nun suone te rompo la capa.
Jesce, jesce sole,
scagliente 'mperatore,
scanniello mio d'argiento
ca vale quattuciento.
Jesce, jesce sole,
Nun chiovere
nun chiovere
ca aggia ire a movere
a movere lu grano
de masto Giuliano.
Masto Giuliano
manname 'na lanza
ca aggia ire in Franza
da Franza a Lombardia
dove stà madama Lucia.
Nun chiovere,
nun chiovere,nun chiovere,
jesce, jesce sole.

 

Madonna de la Grazia
Regina de lu cielo,
o Divina maestà,
chesta grazia ca te cerco
fammella pe' pietà.
Madonna de la grazia
ca 'mbraccio puorte grazia
a vuje vengo pe' grazia
o Maria fance grazia.
Fance grazia o Maria
comme te fece lu Pateterno
ca te fece mamma de Dio
fance grazia o Maria.
Fammella o Maria
fammella pe' carità
pe' li done ca riceviste
dalla Santissima Trinità.
Madonna de la grazia
ca 'mbraccio puorte grazia
a vuje vengo pe' grazia
o Maria fance grazia.
Fance grazia o Maria
comme te fece lu Pateterno
e te fece mamma de Dio
fance grazia o Maria.
Scese l'angelo da lu cielo
e te venne a salutà,
salutà venne a Maria
e nuie cantammo l'Avemmaria.
Comm''è bello de muri'
alli braccia de Maria,
a lu pietto de Gesù
chesto voglio e niente cchiù.
Cara Signora ca 'ncielo tu vaje,
de nuje peccature nun te scurda'.
Madonna de la grazia
ca 'mbraccio puorte grazia
a vuje vengo pe' grazia
o Maria fance grazia.
Fance grazia o Maria
comme te fece lu Pateterno
e te fece mamma de Dio
fance grazia o Maria...

 

Sia maledetta l'acqua
Sia maledetta ll'acqua stammatina
che m'ha disfatt'oimè do puverella.
Me s'è rotta la langella
marammé che pozzo fare,
vicini miei sapitela sanare.
Pe' pruvar'acqua doce de piscina
me so' spaccata la cicinnatella.
Me s'è rotta la langella
marammé che pozzo fare,
vicini miei sapitela sanare.
Pignata rotta nun la vò nisciuno
ca po' t'attocca 'a sta' pure diuno.
Me s'è rotta la langella
marammé che pozzo fare,
vicini miei sapitela sanare.
La pignatella l'hé 'a sape' guardare,
ca po' ch'è rotta nun se po' sanare.
Me s'è rotta la langella
marammé che pozzo fare,
vicini miei sapitela sanare.

 

Li 'ffigliole
Li 'ffigliole che n'hanno ammore
songo nave senza la vela,
so' lanterne senza cannela,
songo cuorpe senza lu core,
li 'ffigliole che n'hanno ammore.
Li 'ffigliole che n'hanno amante,
so' comm'arvole senza frutte,
so' turreno sicco ed asciutte
che non fanno sciure né chiante,
li 'ffigliole che n'hanno amante.
Li 'ffigliole che n'hanno amice
sanno poco che cosa è bene,
quanno po' la vecchiezza vene
s'asciarranno triste e 'nfelice,
li 'ffigliole che n'hanno amice.
Zetelluccie belle e cianciose
mò gustate ca tiempo avite,
mò che tennere e fresche site,
tiempo 'e cogliere mò li rose,
zetelluccie belle e cianciose.
Lu pacchiano ca beve e sciacqua
va 'nforrato de stoppa e llino,
ma se aguanno non se fa vino
se la face 'na panza d'acqua,
lu pacchiano ca beve e sciacqua.

 

Vurria addeventare
Vurria addeventare chianellette e po' stare
sotto a 'sti piere,
ma si lu sapisse
pe' straziarme tu currenno jsse.
Vurria addeventare cetrangolo pe' stare
a 'sta fenesta,
ma si lu sapisse,
pe' darme morte seccare me farrisse.
Vurria addeventare specchio pe' te mirare
accussì bella,
ma si lu sapisse,
a quacche vecchia brutta me darrisse.
Vurria addeventare ghiaccio pe' non bruciare
accussì forte,
ma si lu sapisse
cu' 'st'uocchie ardente tu me squagliarrisse.

 

Cicerenella
Cicerenella mia
sì bbona e bella.
Cicerenella teneva 'no gallo
tutta la notte nce jeva a cavallo,
essa nce jeva po' senza la sella
chisto è lo gallo de Cicerenella.
Cicerenella mia
sì bbona e bella.
Cicerenella tenea 'na gallina
faceva ll'ove de sera e matina,
l'avea 'mparata a magnà farenella,
chesta è 'a gallina de Cicerenella.
Cicerenella mia
sì bbona e bella.
Cicerenella teneva 'na votte
metteva da coppa e asceva da sotto,
ma nun teneva tompagno e cannella,
chesta è la votte de Cicerenella.
Cicerenella mia
sì bbona e bella.
Cicerenella teneva 'nu culo
ca pareva 'nu cofanaturo,
e l'ammustava la notte di stelle,
chisto è lo culo de Cicerenella.
Cicerenella mia
sì bbona e bella.
Cicerenella teneva 'na vacca
c'aizava la coda e mustrava la 'ntacca,
ma nun teneva né ossa né pelle,
chesta è la vacca de Cicerenella
Cicerenella mia
sì bbona e bella.
Cicerenella s'aizava a matina
menava li pisce 'int''o mantesino,
uno fujette da sott''a vunnella,
chisto è lo pesce de Cicerenella.
Cicerenella mia
sì bbona e bella...

 

Si li femmene
Si li femmene purtassero la spada
tristo chill'ommo ca vulesse bene
a donna ca lu cor crudele tene.
Pecché nun sulo lu turmentarria
colli bellizze ma co' la spada ancora
mille ferite le darria ogn'hora.
E ne saccio una ch'è tanto crudele
ca si uno la guardasse diciarria :
pecché me guardi ? E po' l'accidarria…
Forse è buono ca nun portano ll'arme
ma chianellette e trezze e verducate
pe' ffa' murire mille 'nnammurate.

 

Vintitré li fronne
Vintiré li ffronne de verdespina,
de verdespina,
nce nascette ninno chessa matina
chessa matina.
Ma 'na stella lucente
disse tienelo a mente,
a 'stu munno nun guardare
ca li ffronne fa seccare,
si l'ammore vuo' truvare
spine amare haje da chiantare.
Vintitré li rrose ca io chiantaie,
ca io chiantaie,
cu lu chianto mio pò l'addacquaie,
pò l'addacquaie.
Ma lu munno mercante,
ca d'amore è vacante,
tre carline ne vò dare
e li rrose vò cumprare,
'ntra li ddete vò sfrunnare,
po' li vuole scarpesare.
Vintitré streppune fanno lamiento,
fanno lamiento,
nce passaie la notte sott'a lu viento.
'Na chiantuta de stelle,
'na cajola d'aucielle,
ca 'stu munno è tristo assaje
te 'ncatena sempre craje,
quanno primma te guardaje,
e d'ammore te parlaje.
Vintitré catene de tiempo amaro,
de tiempo amaro,
me 'mbarcaje 'nu juorno pe' marenare,
pe' piscare 'n'aniello,
ca perdette 'n'auciello.
Chill' auciello sfurtunato,
ca 'ngajola era 'ncappato,
e a lo mare scunfinato
chill'aniello aveva jettato.
Vintitré li rezze fatt' a canciello,
cu' lu mare attuorno c'è 'nu castiello,
nce passaje sanacore,
nenna mia primm'ammore.
E me disse : nun lu saie
chill'auciello io truvaje,
si lu core me darraje,
vintitré oje vintitré vase avarraje.
Vintiré li ffronne de verdespina
de verdespina,
nce nascette ninno chessa matina,
chessa matina.

 

Vulumbrella
Fatte molla e no cchiù ddura
mò che si' formosa e bella
ca ogne fica vulumbrella
a 'sto tiempo s'ammatura.
Fatte doce e no cchiù amara,
nun te fa' vedere acerba
e non esser tanto brava,
fatte umile e no superba.
Mò ca è verde la toja erba
e lu munno renovella,
ca ogne fica vulumbrella
a 'sto tiempo s'ammatura.
E mò ca sì mmeza ammullata,
e tra fronne fai la guerra
nun aspettare ca si' seccata
e che cade in chiana terra.
Fa' ca po' da te se sferra,
ca sì tosta fredda e bella,
ca ogne fica vulumbrella
a 'sto tiempo s'ammatura.

 

Serenata di Pulcinella
Ué, ué, nenné s'affaccia,
e ca sta' Pullecenella, Pullecenella, Pullecenella
te caccia la lenguella
e dice i' sto ccà, i' sto ccà, ué ca i' sto ccà...
(recitato) ma pecché nun t'affacce, che t'aggio fatto de male, 'nteretella mia?
Ué, ué cu' sta resella,
e cu 'st'uocchie e cu' 'sti vruoccole, cu' 'sti vruoccole, cu' 'sti vruoccole
lu core comm'a spruoccole,
me staje a strazia', a strazia', ué a strazia'...
(recitato) ma pecché nun t'affacce, nun vide ca ce sta Pullecennella ca fa 'a sputazzella?
Gioia de 'st'alma mia jesce ccà ffora,
ca mammeta nun c'è, jesce a 'mmalora.
(recitato) viento ventatela, munte muntatela, stelle stellatela, acqua addacquatela, fuoco 'nfucatela!
Si craje tu truove 'nfosa 'sta chiazza
so' llacreme d'ammore e no sputazza.
(recitato) carugnona, carugnona, carugnona, carugnona, carugnona!

 

Tammurriata
Bella figliola ca te chiamme Rosa
che bellu nomme mammeta t'ha miso,
t'ha miso lu nomme de li rose,
lu meglio sciore ca sta 'mparaviso...
Uh aiuto, aiuto lu munno s'è perduto,
li monache se vonno maritare...
Ncopp''o pont'e Matalune
llà nce stanno 'e 'lampiune,
'e lampiune 'e lampetelle
'o tricchitracco int''a vunnella,
'o piglio mmano 'o poso 'nterra
'o faccio fà Pullecenella...