Tammuriata alli uno... alli uno
Alli uno alli uno
'a tre ghiuorne stò diuno,
alli duie alli duie
meglio a te ca a uno 'e nuie,
alli tre alli tre
vienetenne 'mbraccio a me,
alli quatto alli quatto
mò t''o dongo e mò t''o schiatto,
alli cinche alli cinche
trasatenne 'a part''e dinto,
alli sei alli sei
datemelle 'e robbe meie
alli sette alli sette
'o tuppo 'e mammeta 'int''o vasetto,
alli otto alli otto
baccalà cu 'a carna cotta.
'Nu juorno me jucaie palle e pallucce,
rint'a 'nu vecariello stritto e lungo.
S'affaccia 'a signurella a lu palazzo
"chi ha fatto 'o meglio sei ca saglie 'ncoppa".
Sagliette'ncoppa e la porta abbarrata,
e arreto pe' sepponta 'na pagliuta.
'Ncoppa ce steva 'na nenna cuccata,
ué ué cuscin''e seta manto 'e velluto.
A tiempo a tiempo ce sagliette 'o frato
"tu faccia reggialluta che ffaie lloco"?
"Soreta m'ha chiammato e io aggio venuto,
soreta è 'na vaiassa e tu curnuto"...
Quanto sì bella dammene 'nu poco
uh chello ca tiene è bello
'o tricchitracco 'int''a vunnella...
Uh chello ca tiene aréa
'o cavero 'nfoca 'a penta mea
tu t'arrefrische io m'arrecreo
'o campanaro scampanea,
e Mariagrazia pure se recréa...
E se recréa a ll'uno
tu te gratte a me me prure
è meglio a te ca a uno 'e nuie
e 'ncopp''a prevula pure 'o tiene l'uva,
e nce 'o tiene a bbia a bbia
fosse festa ogni matina,
si tenesse che magna'
io nun vulesse fatica',
chi tene 'a figlia e nun m''a dà'
uh se pozza 'nfraceta'
comm'a 'na scella 'e baccalà...
Uie e baccalà e ll'uno
tu te gratte a me me prure
è meglio a te ca a uno e nuie
stammo cavere tutt'e dduie...
Chello ca tiene tu tengo io pure
e nce 'o tengo io pure 'a jaccio
e quann''a veco me nce abbraccio
e vide che suonne m'aggia fa',
ih che suonno me nce faccio
c''o per'a laccio...
Uh io aggio saputo ca ddoie sore site,
e mai rint'a unu letto ve cuccate.
Io voglio durmire 'na notte cu voi
e quanno durmite è bello
'o tricchitracco 'int''a vunnella
'o masculillo e 'a femmenella
e viene 'a ccà quanto sì bella,
e quanno durmite che penziero fate.
Faccio 'o penziero ca dormo cu vuie
e m'avoto e giro aréa
'o cavero 'nfoca 'a penta mea
e m'avoto e giro e nun te veco maie...
'Ncopp''o pont''e Matalune
llà nce stanno lampiune
'e lampiune 'e llampetelle
'o tricchitracco'int''a vunnella
'o piglio 'mmano 'o poso 'nterra
'o faccio fà Pulecenella...

 

Ricciulina
Oi Ricciulina
oi marranchina
oi signurina,
fai la li la...
Fa' li la li la...
Tu m'he traduto
e m'he feruto
l'aggio saputo,
fai la li la...
Fa' li la li la...
Tu me vuò muorto
ma io me ne accuorto
ma hai gran tuorto,
fai la li la...
Fa' li la li la...
Stella diana
sì ruffiana
fai la puttana,
fai la li la
Fa' li la li la...

 

In galera li panettieri
In galera li panettieri
mò ca s'erano arrecuti,
tutti s'erano resoluti
deventare cavalieri,
in galera li panettieri...
In galera li panettieri
mò ca s'erano 'ngranduti,
nun vedevano li paputi
ca turnavano comm''a ieri,
in galera li panettieri...
In galera li panettieri
se credevano già baroni,
d'affamà la pupulazione
nun se davano penzieri,
in galera li panettieri...
O che spasso che bellu sfizio
quanno venne la giustizia
ca diceva : "mò che ne spieri?"
pava hoggi chello d'ajeri.
in galera li panettieri...

 

Vurria ca fosse ciaola
Vurria ca fosse ciaola e ca vulasse
a 'sta fenesta a dirte 'na parola,
ma no ca me mettisse a la gaiola
E tu da dinto subbeto chiammasse
viene marotta mia, deh viene Cola,
ma no ca me mettisse a la gaiola.
Et io venesse et hommo returnasse
comm'era primmo e te truvasse sola,
ma no ca me mettisse a la gaiola.
E po' turnasse a lu buon sinno gatta
ca me n' ascesse pe' la cataratta,
ma che 'na cosa me venesse fatta.

 

Tammuriata nera
Io nun capisco 'e vvote che succede
e chello ca se vede nun se crede
è nato nu criaturo è nato niro,
e 'a mamma 'o chiamma Ciro, sissignore, 'o chiamma Ciro.
Seh vota e gira seh
seh gira e vota seh
ca tu 'o chiamme Ciccio o 'Ntuono
ca tu 'o chiamme Peppe o Ciro
chillo 'o fatto è niro niro, niro niro comm'a cche...
S''o contano 'e cummare chist'affare
sti cose nun so' rare se ne vedono a migliare,
'e vvote basta sulo 'na guardata,
e 'a femmena è rimasta sott''a botta 'mpressiunata.
Seh 'na guardata seh
seh 'na 'mprissione seh
va truvanno mò chi è stato
c'ha cugliuto buono 'o tiro
chillo 'o fatto è niro niro, niro niro comm'a cche...
E dice 'o parularo, embè parlammo,
pecché si raggiunammo chistu fatto ce 'o spiegammo.
Addò pastin' 'o grano, 'o grano cresce
riesce o nun riesce, semp'è grano chello ch'esce
Meh dillo a mamma meh
meh dillo pure a me
conta 'o fatto comm'è ghiuto
Ciccio, 'Ntuono, Peppe, Ciro
chillo 'o fatto è niro niro, niro niro comm'a che...
Seh 'na guardata seh
seh 'na 'mprissione seh
và truvanno mò chi è stato
c'ha cugliuto buono 'o tiro
chillo 'o fatto è niro niro, niro niro comm'a cche...
'E signurine 'e Capodichino
fanno ammore cu 'e marrucchine,
'e marrucchine se vottano 'e lanze,
e 'e signurine cu 'e panze annanze.
American espresso,
damme 'o dollaro ca vaco 'e pressa
sinò vene 'a pulisse,
mette 'e mmane addò vò isse.
Aieressera a piazza Dante
'o stommaco mio era vacante,
si nun era p''o contrabbando,
ì' mò già stevo 'o campusanto.
E levate 'a pistuldà
uè e levate 'a pistuldà,
e pisti pakin mama
e levate 'a pistuldà.
'E signurine napulitane
fanno 'e figlie cu 'e 'mericane,
nce vedimme ogge o dimane
mmiezo Porta Capuana.
Sigarette papà
caramelle mammà,
biscuit bambino
dduie dollare 'e signurine.
E Ciurcillo 'o viecchio pazzo
s''è arrubbato 'e matarazze
e ll'America pe' dispietto
ce ha sceppato 'e pile 'a pietto.
Aieressera magnai pellecchie
'e capille 'ncopp''e recchie
e capille e capille
e 'o decotto 'e camumilla...
'O decotto,'o decotto
e 'a fresella cu 'a carna cotta,
'a fresella 'a fresella
e zì moneco ten''a zella...

 

'O cunto 'e Masaniello
A lu tiempo de la malora
Masaniello è nu piscatore,
piscatore nun le rincresce
Masaniello se magna 'nu pesce.
Vene subbeto 'o Vicerrè
chistu pesce spett'a mme
tutt'a mme e niente a tte
po' si a tassa vuo' pava',
chistu pesce t''o può 'mpigna'...
A lu tiempo de la malora
Masaniello è nu piscatore.
A lu tiempo de trivule 'mpizze
Masaniello se veste 'a scugnizzo,
nu scugnizzo stracciato e fetente,
Masaniello se magna 'e semmente.
Vene subbeto 'o Vicerrè
'sta semmenta spett'a mme
tutt'a mme e niente a tte
cu 'a semmenta tu te 'ngrasse,
e t''a metto n'ata tassa...
A lu tiempo de trivule 'mpizze
Masaniello se veste 'a scugnizzo...
A lu tiempo de li turmiente
Masaniello se veste 'a fuiente.
Senza rezza e senza cchiù varca,
fa' 'nu vuto a' Maronna 'e ll'Arco...
Vene 'o prevete e 'o Vicerrè
'sta Maronna spett'a mme
tutt'a mme e niente a tte,
chesta è a tassa p''o Pataterno,
o vai subbet'all'inferno...
A lu tiempo de li turmiente
Masaniello se veste a fuiente.
A lu tiempo d''a disperazione
Masaniello se veste 'a lione
nu lione cu ll'ogne e cu 'e riente,
tene 'a famma e tutt''e pezziente.
Vicerrè mò fete 'o ccisto
songo 'o peggio cammurrista,
io me songo fatto 'nzisto,
e cu 'a 'nziria e Masaniello
faie marenna a sarachiello...
A lu tiempo d''a disperazione
Masaniello se veste 'a lione.
A lu tiempo de primmavera
Masaniello se veste 'a bannera.
'Na bannera ca 'o popolo bascio
sona arreto tammorra e grancascia.
Attenzione... battaglione
s'è sparato nu cannone,
è asciuto pazzo lu patrone,
ogge 'nce ha avasciato 'o ppane
ma nun saie fino a dimmane...
A lu tiempo de primmavera
Masaniello se veste 'a bannera.
A lu tiempo de trarimiento
Masaniello 'o vestono 'argiento,
tutt'argiento 'e signure cumpite
mò ce 'o coseno 'stu vestito.
Dice subbeto 'o Vicerrè
simmo eguale io e te
pazziammo cucù e settè,
si rispunne a chist'invito,
t'aggia cosere n'atu vestito...
A lu tiempo de trarimiento
Masaniello 'o vestono 'argiento.
A lu tiempo de li 'ntrallazze
Masaniello è bestuto da pazzo.
Quanno tremma e 'o vestito se straccia,
pure 'o popolo 'o sputa 'nfaccia
'Stu vestito fà appaura
Masaniello se spoglia annuro,
'a Maronna nun se ne cura
po' si 'a capa 'nterra ce lassa
accussì pava ll'urdema tassa.
A lu tiempo de li 'ntrallaze
Masaniello è bestuto da pazzo.
A lu tiempo de 'sti gabelle
Masaniello è Pulicenella.
Si è rimasto cu 'a capa a rinto
ll'ate ridono areto 'e quinte.
Pò s'aumenta 'o ppane e ll'uoglio
saglie 'ncoppa n'atu 'mbruoglio
tira 'o popolo ca ce cuoglie,
nun ce appizza mai la pelle
chi cummanna 'sti guarattelle.
A lu tiempo de 'sti gabelle
Masaniello è Pulicenella
A lu tiempo de chisti scunfuorte
Masaniello è bestuto da muorto.
Dint''a nicchia 'na capa cu ll'ossa
nce ha lassato 'na coppola rossa.
Chesta coppola dà 'na voce,
quanno 'a famme nun è doce,
quann''o popolo resta 'ncroce,
quanno pave 'stu tributo
pure 'a tassa 'ncopp''o tavuto.
A lu tiempo de chisti scunfuorte
Masaniello è bestuto da muorto
Masaniello s''o credono muorto...

 

La morte de mariteto
La morte de mariteto aspett'io
e no per altro no,
ma mi dubito ca primma me mor'io
deh quanto sei bella tu.
Deh ca la vorria trovare
ma non la pozz'asciare
accussì bella comm'a te.
E tutto lu juorno sto addenucchiato
e no per altro no,
e ca Dio m''o lev''a 'nanze ''stu scurore
deh quanto sei bella tu.
Deh ca la vorria trovare
ma non la pozz'asciare
accussì bella comm'a te.

 

Li sarracini adorano lu sole
Li sarracini adorano lu sole
et li turchi la luna cu li stelle
et io adoro chesti trezze belle.
Li marenare quanno hanno furtuna
chiammano per aiuto quacche santo
et io a te sola invoco nel mio chianto.
Tutti li schiavi cercano fuggire
et vurriano spezzare li catene
et io invece cchiù me schiavo a tene.

 

'E spingule francese
'Nu juorno me ne vavo casa casa
vavo vennenno spingule frangese.
Jesce 'na nenna da dint' a 'na casa :
Quanta spingole daje pe' nu turnese?
Io non li benco a grano, manco a turnese,
li benco a chi me da 'na duje vasi.
Bellu figliuolo, nun parla' de vasi,
ca ''mmocca la porta mia,ca 'nfaccia la porta mia,
ca 'mmocca la porta mia ce muor''acciso...
Te l'aggio ditto, nun parla' de vase,
ca tengo ninnu mio, ca ce sta 'o ninnu mio,
ca teng''o ninnu mio ca è no 'mbiso...
Nenna, si me li duone duje vase,
io te dongo li spingole, te dongo li spingole,
te dongo tutt''e spingole e pure 'a spasa.
Te l'aggio ditto, nun parla' de vase,
ca a 'stu paese tu ce rieste acciso...
Zitta nennella mia aggio pazziato,
l'annammurata mia sta 'a lu paese...

 

'O guarracino
'O guarracino ca jeva p'o mare
jeve truvanno de se 'nzorare (... de se 'nguaiare)
se facette 'nu bello vestito
chino chino 'e scorze d'ancino
nu scarpino fatt'a 'ngrese
'a pettinatura a la francese (... 'o cazunciello a la francese)
Allustrato e puletiello
jeva facenno 'o nnammuratiello
'A sardella ca 'o verette
'o ghianco e 'o russo se mettette
po' pigliaie 'o calascione
e 'mpruvvisaie chesta canzone (... po' chiammaie a Pascalone e le cusette lu cazone)
'a canzone c''o liuto
'o guarracino s'è ncannaruto (... s'è nzallanuto)
Passa a tiempo 'a zia vavosa
vecchia trammera zandragliosa
la vavosa pe' 'nu rano
faceva 'a li pisce la ruffiana (... frieva l'ove 'int''a tiana)
jesce llà fora e 'mposta l''o pietto
si vuò stu marito rint''o lietto (... si no t''o fanno 'stu rispietto)
'A sardella a sti parole
se facette 'na bbona scola
de curzera s'affacciaie
e 'o guarracino zenniaie (... e tutte 'e trezze l'ammustraie)
mentre ca lloro amuriggiavano
tutte li pisce se n'addunavano (... la spiavano)
Primma fuie 'na raosta
ca da luntano faceva la posta
pò se ne venne 'a raia petrosa
e la chiammaie uè schefenzosa (... brutta zellosa)
pecché trarev'all'allitterato
ca era geluso e nnammurato (... ca era 'nu piezzo 'e scurnacchiato)
L'allitterato ca l'appuraie
tutti 'e sante jastemmaie
e alluccanno voglio vendetta
corze alla casa comm'a saetta.
Pò s'armaie fino fino
pe' sguarrà lu guarracino (... pe' smazzà lu guarracino)
Marammé oi mamma bella
alluccava la zi' sardella,
e 'a vedé 'stu cumbattimento
le venette 'nu svenimento
le venette 'n'antecore
e tutt'e pisci ascettero fore (... e 'o capitone ascette fore)
Bello e bbuono comm'a niente
ascettero tutte a pisci fetiente.
Tira e molla piglia e afferra
'mmiez'a li pisci lu serra serra
Quatto ciefere arraggiate
se pigliavano a capuzzate tutte li purpe cu ciento vraccia
se pigliavano a pisci 'nfaccia (... a panne 'nfaccia)
'na purpessa a 'na vicina
le faceva lu strascino (... le stracciaie lu suttanino)
Mentre 'e sarde alluccavano a mare
"ca ve pozzano strafucare!"
'nu marvizzo cu 'n'uocchio ammaccato
vuttava mazzate da cecato
quanno cugliette pe' scagno a 'na vopa
chesta pigliaie 'a mazza de scopa
Piglia 'sta mazza e fuje da llà
mannaggia lu pesce c''o baccalà
se secutavano ore e ore
pigliala 'a capa e fuje p''a cora.
Ddoje arenche vecchie bizzoche
se paliavano a poco a poco
e ammaccannose 'o paniello
mettettero mmiezo a 'nu piscitiello
stu piscitiello che era fetente
facette 'na mossa malamente
stu piscitiello svergugnato
facette pe' sotto 'o smaliziato (... disgraziato /... 'o scurnacchiato)
Ma 'nu palammeto bunacchione
magnava e cozzeche c''o limone
e 'nu marvizzo 'o vedette sulo
te lo piglia a cavece 'nculo (... a muorze 'nculo)
tutto 'nzieme a 'sta jurnata
se sentette 'na scuppettata.
Pe' la paura a 'na patella
le venette 'na cacarella
pe' la paura 'a nu piscitiello
le venette 'nu riscinziello (... s'arrugnaie lu ciciniello)
mentre 'nu rancio farabutto
muzzecava li piere a tutte
muorte e bbive ne li stesse
ce cantava 'e Ssante Messe.
S'appiccicavano a mala parole
e se 'nturzavano bbuono li mmole
po' pe' farse 'na bbona ragione
danno de mano a lu cannone
'o cannone facette 'nu scuoppo
lu guarracino restaie zuoppo.
Zuoppo zuoppo mmiez''a via
che mmalora e mamma mia (... tuppe tuppe bella mia / che mmalora e sora mia)
Signure mieie ca sentite
vurria sapé si 'o credite
chi s'agliotte 'sti pallune
tene 'nu bbuono cannarone
chi s'agliotte chesta palla
cu tutti li pisci rimman' a galla.
Zuffamiré e zuffamirella
e 'ntinderindì cu la tarantella (... zuffamiré zuffamirà/mannaggia 'o pesce c''o baccalà)